سەرۆک بارزانی: ناکۆکی نێوان لایەنەکان نابێت ببێتە هۆی شەڕی کورد و عەرەب

ئاڤا نیوز

سەرۆک بارزانی، لە دیدارێکیدا لەگەڵ کەسایەتییەکی سیاسیی سووریا ڕایگەیاند، نابێت ناکۆکیی لایەنەکان لە سووریا ببێتە هۆی شەڕی نێوان کورد و عەرەب.

چیرۆکی سەرەکی: ئەمڕۆ شەممە ڕێککەوتی 16-8-2025، سەرۆک بارزانی لە بارەگای تایبەتی خۆی لە پیرمام پێشوازی لە کەسایەتی سیاسیی سووریا، مەحموود ئەلموسەڵت کرد، لە دیدارێکدا گفتوگۆیان کرد لەبارەی بارودۆخی سووریا و دوایین گۆڕانکارییەکان کرد.

ڕاگەیێنراوی فەرمی: بارەگای بارزانی لە ڕاگەیێنراوێکدا بڵاویکردەوە، سەرۆک بارزانی  لەگەڵ ئەلموسەڵت باسی بارودۆخی سیاسی و دوایین گۆڕانكارییەكانی ناوچەكەی کرد، بە تایبەتی ڕۆژهەڵاتی سووریا.

بارەگای بارزانی ڕاشیگەیاندووە، لە دیدارەکەدا جەخت لەوە كرایەوە، پێویستە هانی لایەنە سیاسیەكانی سووریا و حكوومەتی سووریا بدرێت كە بۆ چارەسەركردنی كێشەكان پشت بە شێوازی دیالۆگ و یەكترقبووڵكردن ببەستن و گرفت و ئالنگارییەكان تێپەڕێنن.

ئەوەش دووپات کرایەوە، نابێت ناکۆکیی لایەنەکان لە سووریا ببێتە هۆی شەڕی نێوان کورد و عەرەب.