فەرماندەیی ئۆپەراسیۆنە هاوبەشەکان: دوو حەشارگەی تیرۆریستان لە سەڵاحەددین و کەرکووک کرانە ئامانج

ئاڤا نیوز

فەرماندەیی ئۆپەراسیۆنە هاوبەشەکانی عێراق، لەنێوبردنی دوو حەشارگەی تیرۆریستانی لە هەردوو پارێزگای سەڵاحەددین و کەرکووک لەڕێگەی هێرشی ئاسمانی و فڕۆکەی F-16ـەوە ڕاگەیاند.

ڕاگەیێنراوی فەرمی: بەگوێرەی ڕاگەیێنراوی فەرماندەیی ئۆپەراسیۆنە هاوبەشەکان، هێزە ئەمنییەکان لە چوارچێوەی ئۆپەراسیۆنە بەردەوامەکانیان بۆ ڕاوەدوونانی پاشماوەکانی "چەتە تیرۆریستییەکان"، دوو گورزی ئاسمانیی سەرکەوتوویان لە حەشارگەکانی تیرۆریستان لە سنووری پارێزگاکانی سەڵاحەددین و کەرکووک وەشاند.

شێوازی جێبەجێکردن: گورزی یەکەم لە ڕۆژی 12ـی ئاب ئەنجامدراوە. دوای چاودێرییەکی وردی هەواڵگری کە چەند ڕۆژی خایاندووە، فڕۆکە جەنگییەکانی جۆری F-16ـی هێزی ئاسمانیی عێراق، حەشارگەیەکی گرنگی تیرۆریستانیان لە "دۆڵی شای" لە ڕۆژهەڵاتی میحوەری ئۆپەراسیۆنەکانی سەڵاحەددین کردە ئامانج.

لەلایەکی دیکەوە: لە ڕۆژی 14ـی ئابدا، فڕۆکەوانەکانی هێزی ئاسمانی هێرشێکی دیکەی وردیان ئەنجامداوە و ئەمجارەیان حەشارگەیەکی دیکەی تیرۆریستانیان لە سنووری میحوەری ئۆپەراسیۆنەکانی کەرکووک کردە ئامانج.

چی ڕوویدا: لە ئەنجامی بۆردوومانەکەدا، حەشارگەکە بە تەواوی وێران بووە و سەرجەم ئەو تیرۆریستانەی لەناویدا بوون کوژراون.