غەززە: 40 هەزار منداڵی ساوا بەدەست "بەدخۆراکیی تووند"ـەوە دەناڵینن

ئاڤا نیوز

بەڕێوەبەری گشتی وەزارەتی تەندروستی لە غەززە ئاشکرای کرد، 40 هەزار منداڵی ساوا بەدەست بەدخۆراکییەکی تووندەوە دەناڵێنن لە کەرتەکە و ڕاشیگەیاند؛ 251 کەس لەبرسان گیانیان سپاردووە.

چیرۆکی سەرەکی: ئیسرائیل لە تشرینی یەکەمی 2023ـەوە  لە هێرشکردنی ئاسمانی و زەمینی و گەمارۆی سەر کەرتی غەززە بەردەوامە، لە ئەنجامدا  نزیکەی 230 هەزار کەس کوژراون، برینداربوون و بێسەروشوێن بوونە، هاوکات سەدان هەزار کەسی دیکە بەدەست برسیکردن و وێرانکاری و ئاوارەبوونی زۆرەملێ دەناڵێنن.

لێدوانی فەرمی: مونیر بەرش، بەڕێوەبەری گشتی وەزارەتی تەندروستی لە غەززە، بە کەناڵی "جەزیرە"ـی ڕایگەیاند، ژمارەی گیانلەدەستدان بەهۆی برسێتی و بەدخۆراکییەوە لە کەرتی غەززە بۆ 251 کەس بەرزبووەتەوە، کە 108ـیان منداڵن.

"نزیکەی هەزار منداڵ بەهۆی بەدخۆراکی و کەمی دەرمانەوە بەشێک لە ئەندامەکانی جەستەیان لەدەستداوە، 40 هەزار منداڵی ساوا بەدەست بەدخۆراکییەکی تووندەوە دەناڵێنن."

گۆشەیەکی دیکەی دیمەنەکە: بەگوێرەی وەزارەتی تەندروستی غەززە، تەنیا لە 24 کاتژمێری ڕابردوودا، بەهۆی بەردەوامی قەیرانی برسێتی و کەمیی پێداویستیی پزیشکی و خۆراکییەکان، 11 فەلەستینی کە یەکێکان منداڵە گیانیان لەدەست داوە.