سەرۆکی هاوپەیمانی عەزم پیرۆزبایی لە سەرۆک بارزانی و پارتی دیموکراتی کوردستان دەکات

ئاڤا نیوز

موسەننا سامەڕائی، سەرۆکی هاوپەیمانیی عەزم سەردانی سەرۆک بارزانی کرد و پیرۆزبایی یادی لە دایکبوونی سەرۆک و ساڵیادی پارتی دیموکراتی کوردستانی کرد.

چیرۆکی سەرەکی: ئەمڕۆ 16ـی ئاب، ساڵیادی لەدایکبوونی سەرۆک بارزانی هاوکات ساڵیادی دامەزراندنی پارتی دیموکراتی کوردستانە، موسەننا سامەڕائی بە یاوەریی شاندێک لە پیرمام سەردانی سەرۆک بارزانی کرد، و پیرۆزبایی ساڵیادی لە دایکبوونی سەرۆک و دامەزراندنی پارتی لە سەرۆک بارزانی کرد هاوکات هەردوولا تاوتوێی چەندین پرسی هاوبەش و پرۆسەی سیاسییان لە عێراق کرد.

بڵاوکراوەی فەرمی: موسەننا سامەڕائی، سەرۆکی هاوپەیمانیی عەزم لە بڵاوکراوەیەک ڕایگەیاند: پیرۆزباییمان لە کاک مەسعود بارزانی و سەرکردایەتی حیزب و کادیرانی بە بۆنەی 79ـیەمین ساڵیادی دامەزراندنی حیزبەکە کرد،  پێزانینی خۆمان بۆ هەوڵەکانی حیزبەکەی لە چەسپاندنی بەهاکانی ئازادی و هاوبەشیی نیشتمانی دەربڕی.

سەرۆکی هاوپەیمانیی عەزم دەشڵێت: باسمان لە ڕێگاکانی هاوبەشی نیشتمانی و یەکخستنی هەوڵەکان بۆ ڕووبەڕووبوونەوەی ئاستەنگەکانی بەردەم وڵات کرد، جەختمان لەسەر گرنگی گفتوگۆی بوونیادنەر و بەرەوپێشبردنی لێکتێگەیشتن لە چارەسەرکردنی کێشە هەڵپەسێردراوەکانی نێوان هەردوو حکومەتی ناوەند و هەرێمی کوردستان کردەوە، بە شێوەیەک یەکێتی عێراق بپارێزێت و ڕێگای گەشەپێدان و سەقامگیری بەرز بکاتەوە.

زانیاریی زیاتر: ئەم سەردانەی سامەڕائی دوای ئەوە دێت، دوێنێ هەینی، سامەڕائی بە یاوەری ئەندامانی لیستی هەڵبژاردنی "تەفەوق" کە بەشێکە لە هاوپەیمانی عەزم، لەگەڵ محەممەد شیاع سوودانی، سەرۆکوەزیرانی عێراق کۆبووەوە.