ناوچەیەکی سووریا داوای "سەربەخۆیی" و جیابوونەوە لە دیمەشق دەکات

ئاڤا نیوز

سەدان کەس لە ناوەندی شاری سوەیدای باشووری سووریا لە ژێر ناونیشانی "مافی چارەنوس" خۆپیشاندانیان سازکرد و دەڵێن، ئەوان بە نا ناوەندی دەسەڵات و ئیدارەی خۆسەرییش ڕازی نین و داوای جیابوونەوەی تەواوەتی لە سووریا دەکەن.

وێنە گەورەکە: ناوەڕاستی مانگی ڕابردوو ڕووبەڕووبوونەوەیەکی خوێناوی لەنێوان پێکهاتەی دروزەکان لە پارێزگای سوەیدا و هێزەکانی سەر بە حکومەتی سووریا ڕوویدا، لە ئەنجامیشدا زیاتر لە هەزار و 600 کەس کوژران و دەیان هەزار کەسیش ئاوارەبوون، لەو کاتەشەوە تائێستا هەرچەندە ئاگربەست ڕاگەیێنراوە، بەڵام دۆخەکە ئاسایی نەبووەتەوە و دروزەکان دەڵێن حکومەت ئابڵوقەیەکی سەختی ئابووریی بەسەردا سەپاندوون.

بینراو و بیستراو: ئاژانسی ئەسیۆشەیتید پرێسی ئەمریکی ڤیدیۆی خۆپیشاندانی دروزەکانی لە سوەیدا بڵاوکردووەتەوە، خۆپیشاندەران داوا لە دۆناڵد ترەمپ، سەرۆکی ئەمریکا و کۆمەڵگەی نێودەوڵەتی دەکەن هاوکارییان بکەن و بەزووترین کات ڕێڕەوی مرۆییان بەڕوودا بکەنەوە، چونکە ئاو و خۆراک و کارەبایان لەسەر بڕدراوە و پێویستییان بە هەموو شتێکە.

لە خۆپیشاندانەکە هیچ ئاڵایەکی سووریا بەرزنەکراوەتەوە، بەڵکو تەنیا ئاڵای تایبەتی پێکهاتەی دروزەکان و چەند ئاڵایەکی ئیسرائیل بەرزکراونەتەوە، لە کاتی خۆپیشاندانەکەشدا ئافرەتێک لەسەر سەکۆی ناڕەزاییەکان قسە دەکات و دەڵێت، "ئێمە ئیدارەی خۆسەری و حکومڕانی فیدراڵییمان ناوێت، بەڵکو سەربەخۆیی تەواوەتیمان دەوێت"، دواتریش لەلایەن خۆپیشاندەرانەوە بە چەپڵەیەکی گەرم پێشوازیی لە داواکارییەکە دەکرێت.