16 هەزار عومرەکاری هەرێمی كوردستان و عێراق لە سعودییە گیریان خواردووە

ئاڤا نیوز


بەهۆی ڕاگیرانی هێڵی ئاسمانی عێراقی، هەزاران عومرەکاری عێراق و هەرێمی کوردستان لە سعودییە گیریان خواردووە و  بەڕێوەبەرایەتی گشتی حەج و عومڕەی کوردستانیش ڕێگاچارەیەک وەک چارەسەری گەڕانەوەی ئەوانەی هەرێمی کوردستان دەگرێتەبەر.

چیرۆکی سەرەکی: بەهۆی چلەی ماتەمینی "ئیمام حسێن"، هەموو گەشتەکانی چارتەری تا کاتێکی نادیار ڕاگرتووە، بەمەش هەزاران عومرەکار لە وڵاتی سعودییە گیریان خواردووە و ناتوانن بەڕێگەی ئاسمانی بگەڕێنەوە.

لێدوانی فەرمی: کاروان ستوونی، وتەبێژی بەڕێوەبەرایەتی گشتی حەج و عومرەی کوردستان بە ئاڤای گوت، "هەر عومرەکارێک ئارەزوو بکات بگەڕێتەوە، پێویستە هەماهەنگی بکات لەگەڵ ئەو کۆمپانیایەی کە لەگەڵی گەشتی کردووە تاوەکو بە ڕێگای وشکانی بە پاس بگەڕێنەوە، ئەگەریش نەیانەوێت بگەڕێنەوە پێویستە لەسەر کۆمپانیاکە شوێنی حەوانەوە و خواردن و خزمەتگوزارییەکان بۆیان دابین بکات تاوەکو گەشتە ئاسمانییەکان دەستپێدەکەنەوە."

ئەمەش بزانە: نزیکەی 16 هەزار عومرەکاری عێراقی لە سعودییە گیریان خواردووە، لە نێویاندا نزیكه‌ی دوو هەزار عومرەکاری هەرێمی کوردستانن.