سۆسیال دیموكرات: لە دوو بازنە بەربژێرمان ڕادەست نەكردووە

ئاڤا نیوز

پارتی سۆسیال دیموکراتی کوردستان، تا ئێستا تەنیا لە دوو بازنە لیستی ناوی بەربژێرەکانی ڕادەستی کۆمیسیۆن کردووە و لە بازنەی هەولێر و سلێمانی هێشتا ڕادەستی نەکردووە.

ئەوەی پێویستە بیزانیت: ئەمڕۆ وادەی ڕادەستکردنی ناوی بەربژێری حيزبەکان بۆ کۆمسیۆنی باڵای سەربەخۆی هەڵبژاردنەکان بۆ 31ی ئەم مانگە درێژکرایەوە، پارتی سۆسیال دیموکراتی کوردستان تا ئێستا تەنیا لە بازنەی دهۆک و هەڵەبجە ناوی بەربژێرەکانی ڕادەستی کۆمیسیۆن کردووە.

لێدوانی فەرمی: فەرهاد تۆفیق، گوتەبێژی پارتی سۆسیال دیموکراتی کوردستان بە ئاڤا نیوزی ڕاگەیاند: لە بازنەی هەولێر و سلێمانی هێشتا ناوی بەربژێرەکانمان ڕادەستی کۆمسیۆن نەکردووە و لە چەند ڕۆژی داهاتوودا ڕادەستی دەکەین، تەنها لە بازنەی دهۆک و هەڵەبجە ناوەکانمان ڕادەست کردووە.

باکگراوند: پارتی سۆسیال دیموکراتی کوردستان، لە سەرجەم هەڵبژاردنەکانی ڕابردووی هەرێمی کوردستاندا بەشداريی کردووە و چەندین جاریش بەشداربووە لە پێکهێنانی کابینەی حکومەتی هەرێمی کوردستاندا و وەزیریان هەبووە.

ئەمەش بزانە: بڕیارە هەڵبژاردنی پەرلەمانی کوردستان ڕۆژی 10-6-2024 بەڕێوەبچێت، بەڵام پارتی دیموکراتی کوردستان لە شێوازی هەڵبژاردنەکە ناڕازییە.