لە سلێمانی دوو بازرگانی ماددەی هۆشبەر بە 19 كیلۆ تلیاكەوە دەستگیر دەكرێن

ئاڤا نیوز

لە سەنتەری شاری سلێمانی، دوو بازرگانی ماددەی هۆشبەر بە بڕی 19 كیلۆگرام ماددەی هۆشبەر لە جۆری تلیاك دەستگیرکران كە هەوڵی بردنە دەرەوەی هەرێمی كوردستانیان داوە.

چیرۆكی سەرەكی: تیمەكانی سەر بە بەڕێوەبەرایەتیی گشتیی نەهێشتنی ماددە هۆشبەرەکان لە دەزگای ئاسایشی هەرێم، بە بڕیاری دادوەری لێكۆڵینەوی ئاسایشی سلێمانی، لە ڕۆژی 5ـی ئەم مانگەوە، چاودێری و بەدواداچوونی ورد بۆ باندێكی مەترسیداری بازرگانیكردن بە ماددەی هۆشبەرەوە دەكەن، دواجار دەست بەسەر بڕی 19 كیلۆگرام ماددەی هۆشبەر لە جۆری تلیاكەوەدا گیرا.

ڕاگەیێنراوی فەرمی: بەڕێوەبەرایەتیی گشتیی نەهێشتنی ماددە هۆشبەرەکان سەر بە دەزگای ئاسایشی هەرێم، ڕاگەیێنراوێكی بڵاوكردووەتەوە و ئاماژەی بەوە كردووە، لە ئەنجامی کۆکردنەوەی زانیاریی پێشوەختە و چاودێری ورد و بەدواداچوونی بەڕێوەبەرایەتیی گشتیی نەهێشتنی ماددە هۆشبەرەکان، بە فەرمانی دادوەری لێکۆڵینەوەی ئاسایش لەشاری سلێمانی، توانییان لە بۆسەیەکدا دوو تۆمەتباری بازرگانی ماددەی هۆشبەر لە نێو شاری سلێمانی دەستگیر بکەن و دەستیش بگرن بەسەر بڕی 19 کیلۆگرام ماددەی هۆشبەر لەجۆری تلیاک كە ئامانجیان شاردنەوە و بردنە دەرەوەی ماددەکە بووە لەڕێگەی بارهەڵگرێکەوە بۆ دەرەوەی هەرێمی کوردستان.

- ئێستا تۆمەتباران بە پێی ماددەی 25 لە یاسای بەرەنگاربوونەوەی ماددە هۆشبەر و كارتێكەرە عەقڵییەكان، ڕاگیراون و لێكۆڵینەوە لە دۆسیەكانیان بەردەوامە.