کۆڵبەرێکی کورد بە چەکی دۆشکە تەقەی لێ دەکرێت و گیان لەدەست دەدات

ئاڤا نیوز

کۆڵبەرێکی کورد لە سنووری بانە بە چەکی دۆشکە تەقەی لێ دەکرێت و دەستبەجێ گیان لەدەست دەدات.

وێنە گەورەکە: دوای تەواوبوونی جەنگی نێوان ئیسرائیل و ئێران، دەیان کەس لەلایەن ئیتلاعاتی ئێرانەوە بە تۆمەتی هاوکاریکردنی ئیسرائیل و تێکدانی ئاسایشیی وڵاتەکە دەستگیرکراون و خراونەتە زیندانەوە، بە جۆرێک چارەنووسی بەشێکیان نادیارە، هەروەها تەقەی هێزە چەکدارەکانی ئێران بۆ سەر کۆڵبەران زیادی کردووە و ڕۆژانە بە تەقەی ڕاستەوخۆ دەکوژرێن.

بڵاوکراوەی فەرمی: ڕێکخراوی هەنگاو بۆ مافەکانی مرۆڤ ڕایگەیاند، دوێنێ یەکشەممە ڕەحمان ڕەسووڵزادە، کۆڵبەری خەڵکی شاری بانە بە تەقەی ڕاستەوخۆی هێزە چەکدارەکانی کۆماری ئیسلامیی ئێران بە چەکی نیوەقوورس لە سنووری «هەنگەژاڵ»ـی بانە کوژرا.

زانیاریی زیاتر: بەپێی زانیارییەکان، ڕەحمان ڕەسووڵزادە بەشێوەی ڕاستەوخۆ بە چەکی نیوەقوورسی «دۆشکە» کراوەتە ئامانج و دەستبەجێ گیانی لەدەست داوە، دواتر تەرمەکەی بۆ نەخۆشخانەی سەڵاحەددینی ئەیوبی لە شاری بانە گواستراوەتەوە.

گۆشەیەکی دیکەی دیمەنەکە: بەپێی ڕاپۆرتی تۆمارکراو کە لە کۆڵبەر نیوز بڵاوکراوەتەوە، لە شەش مانگی سەرەتای ئەمساڵ، 30 کۆڵبەر لە ناوچە سنوورییەکان و ڕێگاکانی نێوان پارێزگاکانی ئازەربایجانی ڕۆژئاوا، کوردستان و کرماشان بە تەقەی ڕاستەوخۆی هێزە چەکدارەکانی ئێران، ڕنوو و سەرما،  لە شاخ و بەرزایی کەوتوونەتە خوارەوە، بە ڕووداوی دیکەش کوژران و بریندار بوون.


ئەوەی پێویستە بیزانیت: لەم ژمارەیە: 14 کۆڵبەر واتە 47٪ کوژران، 16 کۆڵبەر: واتە 53٪ برینداربوون.