دووەمین کۆنفرانسی زانستیی نێودەوڵەتیی جینۆسایدی کورد بەڕێوەدەچێت

ئاڤا نیوز

بڕیارە ڕۆژانی 25و 26ی ئەم مانگە، دووەمین کۆنفرانسی زانستیی نێودەوڵەتیی جینۆسایدی کورد، ڕەنگدانەوەی لە ئەدەب، هونەر و میدیادا  لەسلێمانی بەڕێوەبچێت و چوار کەس خەڵاتی زێڕین وەردەگرن کە ڕۆڵیان هەبووە لە بەجینۆساید ناساندنی کورد لەماوەی ڕابردوودا.

وێنە گەورەکە: لە نیو سەدەی ڕابردوودا، بە چەندین قۆناغ کورد جینۆساید کراوە، جینۆسایدی قەڵادزێ لە 1988، جینۆسایدی کوردانی فەیلی لەنێوان ساڵانی 1963 تا 2003، جینۆسایدی بارزانییەکان بە چوار قۆنا‌غ لەماوەی زیاتر لە 100 ساڵی ڕابردوودا دیارترین وێستگەکانی جینۆسایدی کوردن.

لێدوانی فەرمی: نامق هەورامی، وتەبێژی کۆنفرانسەکە بە ئاڤامیدیای گوت: لەو کۆنفرانسە 28 توێژینەوەی زانستیی لە بارەی جینۆسایدی کورد لەلایەن پسپۆڕ و شارەزایانەوە پێشکەش دەکرێن، کە پێشتر لەلایەن لیژنەیەکی پسپۆڕی بوارەکەوە هەڵسەنگاندنیان بۆ کراوە و پەسندکراون، چوار خەڵاتی ئاڵتوونی بە چوار کەسایەتی کوردی و جیهانیی دەبەخشرێت رۆڵیان هەبووە لە ناساندن و داکۆکیکردن لەو جینۆسایدانەی دەرهەق بە کورد کراوون.

زانیاریی زیاتر: بەوتەی نامیق هەورامی، زیاتر لە 60 میوان لە دەرەوەی هەرێمی کوردستان بانگهێشت کراون، کە سەرجەمیان شارەزاییان هەیە لەبواری جینۆساید. توێژینەوەکان لە هەرێمی  کوردستان و حەوت وڵاتی دیکە بەشداریان پێکراوە،  بە زمانەکانی ئینگلیزی، عەرەبی، فارسی، تورکی پێشکەش دەکرێن.

ئەوەی پێویستە بیزانیت: سەرجەم توێژینەوەکان دەکرێن بە کتێب و چاپ دەکرێت، کۆمەڵێک پێشنیاز و ڕاسپاردەش ئامادە دەکرێن.