وەزارەتی تەندروستی لەڕێگەی ئاڤاوە هۆشداری بە هاونیشتمانیان دەدات

ئاڤا نیوز 

ماوەیەکە لە تۆڕە کۆمەڵایەتییەکان ڕێکلام بۆ جۆرە دەرمانێک دەکرێت گوایە لە دەرەوە هاوردە کراوە و گرەنتی چاککردنەوەی سەد لە سەدە، وا ڕێکلامی بۆ دەکرێت ئەو دەرمانانە بۆ چارەسەری چەند جۆرێکی نەخۆشی، هەوکردنی جومگەکان و کێشەی گورچیلەکان بەکاردێن، ئینجا بە ئۆنڵاینیش دەفرۆشرێن. وەزارەتی تەندروستیش لە ڕێگەی ئاڤاوە ڕوونکردنەوە دەدات. 

چیرۆکی سەرەکی: هاونیشتمانییەک ڤیدیۆیەکی بۆ ئاڤا ناردووە و دەڵێت: دەرمانەکەم کڕیووە بەمەرجی ئەوەی سوودی لێ وەرگرم، بەڵام بەهیچ جۆرێک سوودم لێ وەرنەگرتووە. دواتر ئاڤا میدیا لە ڕێگای وەزارەتی تەندروستییەوە بەدواداچوونی بۆ فرۆشتنی ئەمجۆرە دەرمانانە کرد کە بە ئۆنڵاین دەفرۆشرێن.

لێدوانی فەرمی: د. سەرکار سوورچی، وتەبیژی وەزارەتی تەندروستی بە ئاڤای ڕاگەیاند: هەر دەرمانێک لەڕێگەی ئۆنلاینەوە بفرۆشرێت، جێگەی متمانەی وەزارەتی تەندروستی و کوالێتیی کۆنتڕۆڵ نییە، وەزارەتی تەندروستی لەگەڵ فرۆشتنی دەرمان نییە بەشێوەی ئەلیکترۆنی.

د. سەرکار سوورچی گوتیشی: داوا لە هاونیشتمانیان دەکەم هیچ دەرمانێک بە ئۆنلاین نەکڕن و خۆیان تووشی گرفتی تەندروستیی نەکەن، لەگەڵ ئەوەشدا هەموو دەرمانێک پێویستە ستیکەری کوالێتی کۆنتڕۆڵی دەرمانی پێوە بێت، سەیری ئەو دەرمانەمان کردووە ستیکەری لەسەر نییە بۆیە ڕێگە پێدراو نییە.