پەرلەمانتارێکی پارتی: سەرۆکی هەرێم و حکومەت بۆ پارتی و سەرۆکی پەرلەمان بۆ یەکێتی دەبێت

ئاڤا نیوز

ئەندامێکی فراکسیۆنی پارتی لە پەرلەمانی کوردستان ئاشکرای دەکات، پۆستی سەرۆکی هەرێمی کوردستان و سەرۆکی حکومەت بۆ پارتی و پۆستی سەرۆکی پەرلەمانیش بۆ یەکێتی دەبێت. دەشڵێت، بەپێی ژمارەی کورسییەکان، پارتی زۆرترین سەرۆکایەتیی لیژنە هەمیشەییەکانی پەرلەمان وەردەگرێت.

وێنە گەورەکە: پارتی دیموکراتی کوردستان و یەکێتی نیشتمانی کوردستان لە ڕێککەوتنی کۆتایی پێکهێنانی کابینەی نوێ نزیک دەبنەوە و بڕیارە لە مانگی داهاتوو پەرلەمان کۆببێتەوە، بۆ ئەوەی دەستەی سەرۆکایەتی پەرلەمان هەڵبژێردرێت و هەڵبژاردنی سەرۆکی هەرێمی کوردستان و پێکهێنانی کابینەی نوێ بچێتە بواری جێبەجێکردنەوە.

لێدوانی فەرمی: نەسرەت سۆفی، ئەندامی پەرلەمانی کوردستان لە فراکسیۆنی پارتی بە ئاڤای وت: پۆستی سەرۆکی هەرێمی کوردستان و سەرۆکی حکومەت بۆ پارتی دەبێت و پۆستی سەرۆکی پەرلەمان بۆ یەکێتی دەبێت.

نەسرەت سۆفی ئەمانەشی وت:

- شاندی دانووستانکارانی پارتی و یەکێتی گەیشتوون بەو دەرەنجامەی مانگی نۆ پەرلەمان کۆببێتەوە، بەڵام تا ئێستا ڕۆژی کۆبوونەوەکە دیاری نەکراوە.

- لە دەستەی سەرۆکایەتیی پەرلەمان سەرۆک بۆ یەکێتی و جێگر بۆ پارتی دەبێت و پۆستی سکرتێر یەکلایی نەبووەتەوە.

- بەپێی ژمارەی کورسیییەکان، پارتی زۆرترین سەرۆکایەتیی لیژنە هەمیشەییەکانی پەرلەمان وەردەگرێت.

- بەربەستی گەورە لەبەردەم پێکهێنانی کابینەی نوێ نەماوە.

- پێکهاتەکان لە حکومەت و پەرلەمان بەشدار دەبن و وەک پێکهاتەی ڕەسەنی ئەم ولاتە مامەڵەیان لەگەڵ دەکرێت.

- "پەیوەندی زۆر باش و توندووتۆڵمان لەگەڵ یەکێتی هەیە، دوو حزبی هاوبەشین و بەرپرسین لە نەخشەی سیاسیی هەرێمی کوردستان، زۆرجار ئەگەر گرژی و ناکۆکی هەبێت، بەڵام تێڕوانینی هاوبەشمان بۆ خزمەتی هەرێمی کوردستان و پاراستنی ئەو ئەزموونە وەکو یەکە".

باکگراوند: ڕێککەوتی 20-10-2024 هەڵبژاردنی خولی شەشەمی پەرلەمانی کوردستان بەڕێوەچوو کە دوو ملیۆن و 888 هەزار و 162 کەس مافی دەنگدانیان هەبوو، لەو ژمارەیەش، دوو ملیۆن و 672 هەزار و 43 کەس لە دەنگدانی گشتی و 216 هەزار و 119 کەسیش لە دەنگدانی تایبەت مافی دەنگدانیان هەبوو.