گەنجێکی تەمەن 19 ساڵ لە ناحیەی بالیسان خنکا

ئاڤا نیوز

گەنجێکی تەمەن 19 ساڵ، لە کاتی مەلەکردندا لە حەوزێکی ئاودا لە گوندی توتمەی سەر بە ناحیەی بالیسانی قەزای شەقڵاوە، گیانی لەدەستدا.

چیرۆکی سەرەکی: دوای نیوەڕۆی ئەمڕۆ ، گەنجێک بە مەبەستی مەلەکردن چووەتە حەوزێکی ئاو کە لە نزیک کانییەک لە دەوروبەری گوندی توتمە دروستکراوە و لەکاتی مەلەکردن گیانی لەدەستدا.

لێدوانی فەرمی: فەرهاد خۆشناو، بەڕێوەبەری کارگێڕی نەخۆشخانەی بالیسان، بە ئاڤای وت، "دوای ئاگادارکردنەوەمان بە بوونی ڕووداوێکی خنکان، دەستبەجێ تیمەکانمان گەیشتنە شوێنی ڕووداوەکە و فریاگوزاری سەرەتاییان بۆ ئەنجامدا، بەڵام بەداخەوە گیانی لەدەستدابوو."

زانیاریی زیاتر: سەبارەت بە هۆکاری ڕووداوەکە، خۆشناو ئاماژەی بەوەدا کە گەنجەکە پێشتر نەخۆشی سەرعی هەبووە و گوتی: "پێدەچێت لەکاتی مەلەکردندا تووشی بوورانەوە هاتبێت، کە بووەتە هۆی خنکانی."

بۆ دڵنیابوونەوە لە هۆکاری سەرەکی گیانلەدەستدانەکەی، تەرمی گەنجەکە ڕەوانەی پزیشکی دادی هەولێر کراوە بە مەبەستی توێکاری.