لە هەولێر چەند نۆرینگەیەکی پزیشکی دادەخرێت

ئاڤا نیوز

بەڕێوەبەری گشتیی تەندروستی هەولێر ڕایگەیاند، ژمارەیەک پزیشک بەهۆی نەبوونی پسپۆرایەتییان لە کارەکانیان دوورخرانەوە و نۆرینگەکانیشیان داخرا.

چیرۆکی سەرەکی: ژمارەیەک کەس کە خۆیان بە پزیشک ناساند بوو و چارەسەری نەخۆشیان دەکرد، بەڵام لە بنەڕەتدا نە پزیشکن  و نە مۆڵەتیان هەیە، ئەو کەسانە لەلایەن لیژنەکانی بەڕێوەبەرایەتیی تەندروستی هەولێر بە هەماهەنگی لەگەڵ سەندیکای پزیشکان، نۆرینگەکانیان داخراوە و ڕێکاری یاساییان بەرامبەر گیراوەتەبەر.

لێدوانی فەرمی: دکتۆر دڵۆڤان محەممەد، بەڕێوەبەری گشتیی تەندروستی هەولێر، بە ئاڤا میدیای ڕاگەیاند، هەندێک کەس خۆیان بە پزیشکی پسپۆر ناساند بوو، لە ڕاستیدا تەنیا هەڵگری بروانامەیەکی پزیشکی بوونە، بەڵام پزیشکی پسپۆڕ نەبوونە، لە نۆرینگەکان یان لە سۆشیاڵ میدیا خۆیان بە پزیشک ناساند بوو، بە هەماهەنگی لەگەڵ سەندیکای پزیشکان ئەو کەسانە لە کارەکانیان دوورخراونەتەوە و ڕێکاری یاساییان بەرامبەر گیراوەتەبەر.

دکتۆر دڵۆڤان، دەڵێت، زۆربەی ئەو کەسانە کورد نین یان لە دەرەوەی کوردستان هاتوون بۆ هەولێر، نۆرینگەیان داناوە، یان لەڕێگەی سۆشیاڵ میدیاوە ڕێكلام بۆ خۆیان دەکەن.

لەلایەکی دیکەوە: سەندیکای پزیشکانی کوردستان، لقی هەولێر بە نووسراوی فەرمی لیستی ناوی 23 پزیشکی بڵاوکردووەتەوە، بە فەرمی ڕێگەپێدانی کارکردنی ئەو پزیشکانەی پوچەڵکردووەتەوە کە بۆیان نیە بەهیچ شێوەیەک کاری پزیشکیی گشتیی ئەنجام بدەن، چونکە پزیشک نین.