ماکرۆن: لە ئەگەری شکستهێنانی دیپلۆماسییەت دەبێت سزای تووند بەسەر ڕووسیا بسەپێنرێت

ئاڤا نیوز

دوای کۆبوونەوەی لەگەڵ سەرکردەکانی ئەمەریکا و ئۆکراینا و ئەورووپا، سەرۆکی فەرەنسا داوای سزای تووند بۆ سەر ڕووسیا دەکات لە ئەگەری شکستهێنانی ڕێگا دیپلۆماسییەکان.

وێنە گەورەکە: دوێنێ دووشەممە، 18-8-2025، سەرکردەکانی  ئەوروپا و ڤۆلۆدیمێر زێلێنسکی، سەرۆکی ئۆکراینا، لەگەڵ سەرۆکی ئەمریکا لە کۆشکی سپی کۆبوونەوە و ئامانجی سەرەکی ئەو کۆبوونەوەیە دۆزینەوەی ڕێگا چارەیەک  بوو بۆ کۆتاییهێنان بە جەنگی ڕووسیا و ئۆکراینا کە ماوەی زیاتر لە سێ ساڵە بەردەوامە.

لێدوانی فەرمی: ئیمانوێل ماکرۆن، سەرۆکی فەرەنسا ڕایگەیاند: ئەگەر دیپلۆماسیەت و دانوستانەکانی ئاشتی لە نێوان ڕووسیا و ئۆکراینا شکست بهێنن، ئەوا پێویستە سزا و فشارەکان بۆ  سەر ڕووسیا تووندتر بکرێن و هەموو سەکردە ئەورووپییەکانیش بەم داوایە ڕازین و هاوڕان''.

زانیاریی زیاتر: یەکێک لە بابەتە سەرەکییەکانی کۆبوونەوەکە، پێدانی گەرەنتی ئەمنیی بەهێز بوو بە ئۆکراینا وەک بەشێک لە هەر ڕێککەوتنێکی ئاشتی، هاوکات ماکرۆن گوتی، "یەکێک لە گرنگترین گەرەنتییەکان بریتییە لە بوونی سوپایەکی بەهێزی ئۆکراینی".