دوایین زانیاریی دەربارەی کۆبوونەوەی ئەمڕۆی ئەنجوومەنی وەزیرانی عێراق

ئاڤا نیوز

پرسی شایستە داراییەکان و مووچەی مووچەخۆرانی هەرێمی کوردستان لە ئەجێندای کۆبوونەوەی ئەنجوومەنی وەزیرانی عێراق نییە و باس کردنیشی پەیوەندی بە دەرەنجامی کۆبوونەوەی ئەمڕۆی لیژنەکانی هەولێر و بەغدا دەبێت.

چیرۆکی سەرەکی: بڕیارە ئەمڕۆ ئەنجوومەنی وەزیرانی عێراق کۆببێتەوە، پرسی مووچەی مووچەخۆران و شایستە داراییەکانی هەرێمی کوردستان لە ئەجێندای کۆبوونەوەکە نییە، چاوەڕێ دەکرێت بەپێی دەرەنجامی کۆبونەوەکانی شاندی هەرێمی کوردستان و کۆبوونەوەی لیژنەی وزاری عێراق، ئەم پرسە لە کۆبوونەوەی ئەنجوومەنی وەزیران گفتوگۆی لەبارەوە بکرێت.

زانیاریی تایبەت: سەرچاوەیەک لە وەزارەتی دارایی و ئابووری هەرێمی کوردستان بە ئاڤای گوت، شاندێکی هەرێمی کوردستان کە پێکهاتوون لە شاندێکی ئەنجوومەنی وەزیران و ژمارەیەک بەڕێوەبەری گشتیی وەزارەتی دارایی، لەگەڵ وەزارەتی دارایی عێراق و دیوانی چاودێری دارایی کۆدەبنەوە.

لەلایەکی دیکەوە: ئەمڕۆ ئەو لیژنە وزارییەی لە ئەنجوومەنی وەزیرانی عێراق پێکهێنراوە کۆدەبێتەوە و بڕیارە ڕاپۆرتێکی تایبەت بۆ کۆبوونەوەی ئەنجوومەنی وەزیران ئامادە بکات.

زانیاریی پەیامنێر: دەروون مەلا ناجی پەیامنێری ئاڤامیدیا لە بەغدا گوتی: بابەتی شایستە داراییەکانی هەرێمی کوردستان و بڕیاردان لە ناردنی مووچە لە ئەجێندای کۆبوونەوەی ئەنجوومەنی وەزیرانی عێراق نییە، باسکردنی ئەم بابەتەش پەیوەندی بە ناوەرۆک و دەرەنجامی کۆبوونەوەکانی شاندی هەرێمی کوردستان لەگەڵ وەزارەتی دارایی و دیوانی چاودێری دارایی عێراق و کۆبوونەوەی لیژنە وزارییەکە دەبێت، ئەگەر لە کۆبوونەوەکان ڕاپۆرت ئامادە بکەن لە ئەنجوومەنی وەزیرانیش گفتوگۆی دەربارە دەکات.

زانیاریی بەدەستهاتوو: بەپێی زانیارییەکان، کۆبوونەوەی ئەمڕۆی ئەنجوومەنی وەزیرانی عێراق بە سەرۆکایەتیی محەممەد شیاع سوودانی، لە هەشت تەوەر پێکهاتووە و بە فەرمی باس لە مووچەی هەرێم ناکات. لەگەڵ ئەوەشدا، پێشبینی دەکرێت هاوشێوەی کۆبوونەوەکانی پێشوو، وەزیرە کوردەکان داواکارییەکە پێشکەش بە سەرۆکوەزیران بکەن، تەیف سامی وەزیری داراییش، ڕاپۆرتی لیژنەکانی گفتوگۆی هەولێر و بەغدا بخاتە بەردەم ئەنجوومەنی وەزیران.

ئەوەی پێویستە بیزانیت: دوای لێکتێگەیشتنی نێوان هەرێمی کوردستان و عێراق، لەسەر مەلەفی نەوت ڕێککەوتن کراوە، بەڵام هێشتا لەسەر مەلەفی داهاتی ناوخۆی هەرێمی کوردستان نەگەیشتوون بە رێککەوتن و گفتوگۆکانی نێوان هەردوولا بەردەوامە.