چوار بانک لە هەرێمی کوردستان قەرزی دانانی سیستمی کارەبای وزەی خۆر دەدەن

ئاڤا نیوز

لەهەرێمی کوردستان داواکاری بۆ سوود وەرگرتن لە وزەی خۆر بەمەبەستی دابینکردنی کارەبا ڕوو لە زیادبوونە، ڕۆژانە هاونیشتمانیان مامەڵەکانیان بۆ دانانی کارەبای وزەی خۆر "سیستمی سۆلار" لە ماڵ و شوێنە بازرگانییەکانیان دەکەن.

وێنە گەورەکە: هاوشان لەگەڵ پڕۆژەی ڕووناکی، حکومەت پاڵپشتی بەرهەمهێنانی كارەبا لە وزەی خۆر دەکات، بۆ هاندان و هاوکاریکردنی خەڵکیش پڕۆژەیەکی تایبەتی هەیە، بیرۆکەی ئەوە هەیە لەڕێگەی بانکەکانەوە قەرزی درێژخایەن بە هاووڵاتییان دەدرێت.

 

لێدوانی فەرمی: د. ئامانج هەرکی، ئەندامی لیژنەی وزە لە پەرلەمانی عێراق بە ئاڤای گوت، "بانکەکانی جیهان، ئاڕتی بانک، بانکی تەنمییە و لەماوەی نزیکیش تی بی ئای قەرزەکە بە هاونیشتمانیان دەدەن، تاوەکو ئێستا ژمارەیەک هاووڵاتی لە سنووری هەولێر قەرزەکەیان وەرگرتووە."

 

شێوازی جێبەجێکردن: لە وێبسایتی وەزارەتی کارەبا، ئەو کۆمپانیایەی سیستمەکە جێگیر دەکەن بڵاوکراونەتەوە، هاووڵاتی کۆمپانیاکە ‌‌هەڵدەبژێرێت، ڕێنمایی و خزمەتگوزارییەکانی لێوەردەگیرێت، دەچێتە یەکێک لە بانکەکان ئەگەر بەخێرایی مامەڵەکەی بکات پێنج ڕۆژ دەخایەنێت، بۆ ماڵەکان حەوت بۆ 30 ملیۆن دیناریان پێدەدرێت، دوای شەش مانگ دانەوەی قەرزەکە دەستپێدەکات و ساڵانە 3٪ـی عمولەی کارگێڕی دێتە سەر، لەماوەی حەوت ساڵ دەدرێتەوە.

 

زانیاریی زیاتر: لە بانکەکان پارەکە ڕاستەوخۆ بە هاووڵاتی نادرێت، بەڵکو چەکە و بۆ کۆمپانیاکە خەرج دەکرێت، پڕۆژە گەورەکانیش دەتوانن تاوەکو یەک ملیار دینار قەرز وەرگرن.