لەسەر ڕاسپاردەی مەسرور بارزانی ناردنی تووشبووانی تالاسیمیا بۆ چارەسەر بۆ دەرەوەی وڵات دەستیپێکرد

ئاڤا نیوز

لەسەر ڕاسپاردەی سەرۆکوەزیران مەسرور بارزانی، وەزارەتی تەندروستیی هەرێمی کوردستان دەستیکرد بە ناردنی تووشبووانی نەخۆشیی تالاسیمیا بۆ وڵاتی تورکیا بەمەبەستی وەرگرتنی چارەسەری پێویست و ئەنجامدانی نەشتەرگەریی چاندنی مۆخی ئێسک.

ئەوەی پێویستە بیزانیت: ئەمڕۆ سێشەممە ڕێککەوتی 19ـی 8ـی 2025، یەکەم کاروانی تووشبووان کە پێکهاتبوون لە هەشت نەخۆش و هەشت بەخشەر، ڕەوانەی وڵاتی تورکیا کران.

لێدوانی فەرمی: د. سامان بەرزنجی، وەزیری تەندروستیی هەرێمی کوردستان، لە لێدوانێکدا ڕایگەیاند: "لەم قۆناغەدا کۆی گشتیی ئەو نەخۆشانەی ڕەوانە دەکرێن 140 کەسە و پرۆسەکەش بەردەوام دەبێت."

وەزیری تەندروستی ئاماژەی بە تێچووی چارەسەرەکەش کرد و وتی: "تێچووی هەر نەشتەرگەرییەک لەسەر ئەرکی حکومەتی هەرێمی کوردستانە. ئەگەر تووشبووەکە بەخشەری هەبێت، تێچووەکەی 75 ملیۆن دینارە، ئەگەریش بەخشەری نەبێت، 95 ملیۆن دینار تێچووی دەبێت."

خاڵە ئەرێنییەکان: ئەم هەنگاوەی حکومەتی هەرێمی کوردستان هیوا و دەرفەتێکی نوێ بە نەخۆشانی تالاسیمیا دەبەخشێت بۆ وەرگرتنی چارەسەری بنەڕەتی و باشترکردنی دۆخی تەندروستییان.