نەتەوە یەکگرتووەکان: ساڵی ڕابردوو نزیکەی 400 کارمەندیی کاری مرۆیی کوژراون، نیوەیان لە غەززە بوون

ئاڤا نیوز

نەتەوە یەکگرتووەکان لە ڕاپۆرتێکیدا ئاشکرایکرد، لە ساڵی ڕابردوودا نزیکەی 400 کارمەندی فریاگوزاری مرۆیی لە ناوچە جێناکۆکەکان کوژراون و نیوەی ئەو کرێکارانە لە غەززە بوون. هاوکات داوای کرد تۆمەتباران سزا بدرێن و سنوورێک بۆ ئەم کردەوانە دابنرێت.

وێنە گەورەکە: ئەمڕۆ 20ـی ئاب، ڕۆژی جیهانی "کاری فریاگوزاریی مرۆیی"ـە بەگوێرەی نەتەوە یەکگرتووەکان  توندوتیژی دژ بە کارمەندانی فریاگوزاری لە ساڵی 2024 بە بەراورد بە ساڵی پێشووتر لە 21 وڵات زیادی کردووە و لایەنە حکومییەکان زۆرترین کوشتنیان ئەنجامداوە.

ڕاگەیێنراوی فەرمی: نووسینگەی هەماهەنگی کاروباری مرۆیی (ئۆچا)ـی سەر بە نەتەوە یەکگرتووەکان ڕایگەیاند، زۆربەی ئەو کارمەندە مرۆییانەی کوژراون لە کاتی جێبەجێکردنی ئەرکەکانیان یان لە ماڵەکانیاندا کراونەتە ئامانج، لە ساڵی ڕابردوودا 383 کارمەندیی مرۆیی کوژراون 181ـیان لە شەڕی غەززەدا بووە، ئەمەش ئاماژەیە بۆ ئەوەی ژمارەی کوژراوانی ساڵی 2024 بە بەراورد بە ساڵی پێشووتر بە ڕێژەی 31% زیادیکردووە.

زانیاریی زیاتر: لەپاڵ کوژراوان، 308 کارمەندی دیکەی بواری مرۆیی بریندارن، 125ـی دیکە ڕفێنراون و 45 کارمەندیش دەستگیرکراون.

لەلایەکی دیکەوە: ئۆچا دەڵێت: مانگەکانی یەکەمی ساڵی 2025 هیچ نیشانەیەکی کەمبوونەوەی ئەم دیاردە مەترسیدارەیان نیشان نەداوە، ئاماژەی بەوەشکردووە، تا 14ـی ئابی ئەمساڵ، 265 کارمەندی فریاگوزاری لە سەرانسەری جیهاندا کوژراون.