وەزارەتی ڕۆشنبیری کتێبخانە و ئەرشیفی مامۆستا عەزیز گەردی دەكڕێتەوە

ئاڤا نیوز

لەسەر ڕاسپاردەی سەرۆکی حکومەتی هەرێمی کوردستان، وەزارەتی ڕۆشنبیری و لاوان، دەستنووس و کتێبخانە و ئەرشیفی مامۆستا عەزیز گەردی كە لە 18 هەزار سەرچاوە و ناونیشانی جۆراوجۆر پێکهاتووە دەكڕێتەوە؛ بڕیارە لە داهاتوویەکی نزیکدا، بخرێتە خزمەتی سوودی گشتیی و دەستنووسەکانیشی چاپ و بڵاو بکرێنەوە.

وێنە گەورەكە: کتێبخانە و ئەرشیفی مامۆستای کۆچکردوو عەزیز گەردی، بە گەنجینەیەکی دەوڵەمەندی سەرچاوە و ناونیشانی دەگمەن و مێژوویی هەژمار دەکرێت، بەهایەکی گرنگی هەیە بۆ کایەی ڕۆشنبیری و مێژووی بزاوتی چاپ و بڵاوکردنەوەی کتێبی کوردی.

بڵاوكراوەی فەرمی: وەزارەتی ڕۆشنبیری و لاوان لە ڕوونکردنەوەیەکدا بۆ ڕای گشتی، وردەکاری پڕۆسەی گفتوگۆ و دیدارەکانی شاندی وەزارەتی لەگەڵ میراتگرانی کۆچکردوو د. عەزیز گەردی خستەڕوو، ڕاشیگەیاندووە، لە هەوڵەکانی بەردەوامە بە مەبەستی بەدەستهێنانی مافی خاوەندارێتیی کتێبخانە و دەستنووسەکانی مامۆستای کۆچکردوو لە چوارچێوەیەکی یاساییدا.

زانیاریی زیاتر: بۆ گفتوگۆكردن لەگەڵ میراتگرانی نووسەری كۆچكردوو، وەزارەتی ڕۆشنبیری لیژنەیەکی بە سەرۆکایەتی بریکاری وەزارەت و ئەندامیەتی ڕاوێژکارێکی وەزارەت، بەڕێوەبەری ڕاگەیاندن و پەیوەندییەکان و بەرپرسی بەشی یاسایی وەزارەت پێکهێناوە. دوای زنجیرەیەک کۆبوونەوە و دیدار، بە بڕیاری دادگا مافی خاوەنداریەتیی کتێبخانەکە لەڕێگەی زیادکردنێکی ئاشکرا بەخشرا بە یەکێک لە میراتگرەکان، دواتر وەزارەت سەرجەم کتێبخانە و ئەرشیف و دەستنووسەکانی لەو میراتگرە کڕییەوە.

بابەتە ستراتیژییەكە: بڕیارە لە داهاتوویەکی نزیکدا، ئەو ئەرشیف و کتێبخانە دەوڵەمەندە، کە زیاتر لە 18 هەزار سەرچاوە و ناونیشانی جیا لە خۆ دەگرێت، بخرێتە خزمەتی بەرژەوەندیی گشتی، کتێبخانەیەکی تایبەتیش بە ناوی "کتێبخانەی د. عەزیز گەردی" بکرێتەوە، هەروەها دەستنووسەکانیش چاپ و بڵاوبکرێنەوە.