دادوەرە میهرەبانەکەی ئەمریکا لە تەمەنی 88 ساڵیدا کۆچی دوایی کرد

ئاڤا نیوز

ئەمشەو دادوەرە میهرەبانەکەی ئەمریکا، فرانک کاپریۆ لە تەمەنی 88 ساڵی بە نەخۆشی شێرپەنجە کۆچی دوایی کرد.

چیرۆکی سەرەکی: دادوەر فرانک کاپریۆ، کەسایەتیی خۆشەویست و سەرۆکی پێشووی دادگای شارەوانیی پرۆڤیدێنس  لە ویلایەتی ڕۆدی ئایلەند لەدوای ململانێیەکی درێژخایەن لەگەڵ شێرپەنجەی پەنکریاس، لە تەمەن 88 ساڵیدا کۆچی دوایی کرد.

زانیاریی زیاتر: کاپریۆ، کە بە بەزەیی، خۆنەویستی و باوەڕی پتەوی بە چاکەی مرۆڤەکان ناسرابوو، کاریگەریی لەسەر ژیانی ملیۆنان کەس لەناو هۆڵی دادگا و لە دەرەوەیدا هەبوو. گەرمی، قسەخۆشی و میهرەبانییەکەی شوێنەوارێکی  زۆری لەسەر هەموو ئەوانە جێهێشت کە دەیانناسی.

باکگراوند: فرانک کاپریۆ لە 24ـی 11ـی 1936 لە شاری پرۆڤیدێنس، لەدایکبووە و کوڕی کۆچبەرێکی ئیتاڵی بووە. لە ساڵی 1985 وەک دادوەری دادگای شارەوانیی پرۆڤیدێنس دەستنیشانکرا و تا خانەنشینبوونی لە ساڵی 2023 لەو پۆستەدا مایەوە.

ئەوەی پێویستە بیزانیت: لە کۆتاییەکانی ساڵی 2023، کاپریۆ ڕایگەیاند کە تووشی شێرپەنجەی پەنکریاس بووە و دەستی بە وەرگرتنی چارەسەر کردووە. سەرەڕای نەخۆشییەکەی، ئەو هەمیشە هیوای بە ژیان مابوو و بەردەوام بوو لە بڵاوکردنەوەی پەیامی ئەرێنی و داوای نزای لە خەڵک دەکرد.