ئەمساڵ گەورەترین گۆڕانکاری لە پڕۆگرامەکانی خوێندن دەکرێت

ئاڤا نیوز

بۆ ئەمساڵ وەزارەتی پەروەردەی کوردستان گۆڕانکاری لە بەشێکی کتێبەکانی پڕۆگرامی خوێندن کردووە، بەشێکیان لە نوێ دانراون واتا (کتێبێکی نوێ بۆ بابەتەکە دانراوە)، بەشێکیشیان پڕۆگرامی نوێن بۆ خوێندن وەکو زیادکردنی کتێبێکی نوێ بۆ فێرکردنی ژمارەکان لە بازنەی یەکەم.

وێنە گەورەکە: ساڵانە وەزارەتی پەروەردە بەپێی گۆڕانکارییە زانستییەکان و پێداویستییە پەروەردەییەکان، گۆڕانکاری لە پڕۆگرامەکانی خوێندن دەکات.

لێدوانی فەرمی: حەسەن سەرتیپ جاف، بەڕێوەبەری گشتیی پڕۆگرامەكانی خوێندن لە وەزارەتی پەروەردە بە ئاڤا میدیای گوت: بەپێی بەرزترین ستانداردی جیهانی و بەباشترین کوالێتی گەورەترین گۆڕانکاریمان لە پڕۆگرامەکانی خوێندن کردووە، 142 کتێب چاپکراون کە بریتین لە دانانی نوێ، ئامادەکردن و گۆڕینی پرۆگرام.

ساڵانی پێشووتر ئەو گۆڕانکارییانە لە ڕێگەی کۆمپانیاکانی دەرەوە بە تێچووی زۆر دەکران، بەڵام ئێستا هەموو ئەو گۆڕانکارییانە لە لایەن مامۆستایان و فەرمانبەرانی وەزارەتی پەروەردە و ژمارەیەک لە مامۆستایانی زانکۆ و ژمارەیەک خۆبەخش کراون، بەبێ ئەوەی هیچ تێچووێک لە دیزاین و گۆرانکارییەکان لەسەر حکومەتی بکەوێت.

زانیاریی زیاتر: گۆڕانکارییەکانی پڕۆگرام و بابەتە نوێیەکان ئەمانەن:

٠ 32 کتێبی نوێ بۆ پەیمانگەی پیشەی بەشی ئینگلیزی.

٠ 12 کتێب و شەش کتێبی ڕێبەری باخچەی ساوایان بۆ ئاستی یەکەم و دووەم.

٠ بۆ بازنەی یەکەم پۆلەکانی (یەک، دوو، سێ)ـی بنەڕەتی سێ بیرکاری و سێ کتێبی کوردی گۆڕاون، کتێبێکی نوێ بۆ فێربوونی ژمارەکان، سێ کتێبی بابەتی هونەری ئامادەکراون بۆ هەرچوار بەشی شێوەکاری، شانۆ، موزیک و سینەما.

٠ بازنەی دووەم پۆلەکانی (چوار، پێنج، شەش)ـی بنەرەتی، زانستی پۆلی چوار و پۆلی پێنج گۆڕاون.

٠ هەموو بابەتەکانی کۆمەڵایەتی (جوگرافیا، ئابووری، مێژوو) لە پۆلی چواری بنەڕەتی تا پۆلی 12ـی ئامادەیی هەمووی گۆڕاون.

٠ گۆڕینی زانستی پۆلی حەوت.

٠ گۆڕینی کیمیای پۆلی 10.

٠ گۆڕینی بیرکاری پۆلی 10ـی وێژەیی.

٠ دوو کتێبی دەرووناسی بۆ پۆلی هەشت و 10 دانراون.

٠ ڕێبەری وەرزش لە پۆلی یەک تا شەشی بنەڕەتی دانراون.

٠ کتێب و ڕێبەری وەرزشی لە پۆلی حەوت تا نۆی بنەڕەتی دانراون.

٠ ژمارەیەک پرۆگرامی نوێش بۆ ئامادەیی پیشەیی دادەنرێن.

گۆشەیەکی دیکەی دیمەنەکە: هەموو بابەتەکان بە پێنج زمان ئامادەکراون کوردی، عەرەبی، ئینگلیزی، سریانی و تورکمانی، زمانی کوردیش بەهەردوو شێوەزاری سۆرانی و بادینی

ئەوەی پێویستە بیزانیت: هەموو بابەتەکانی باخچەی ساوایان و بازنەی یەکەم ئەلیکترۆنین و دەتوانرێت لە ڕێگەی مۆبایلی زیرەک بەبێ هێڵی ئینتەرنێت سوودیان لێوەربگیرێت.