دووەم پرۆسەی دەنگدانی تاقیکاری بەڕێوەدەچێت

ئاڤا نیوز

وەک ئامادەکارییەک بۆ پرۆسەی دەنگدانی گشتی، کۆمیسیۆنی باڵای سەربەخۆی هەڵبژاردنەکان دووەم پڕۆسەی دەنگدانی تاقیکاری ئامێرەکانی دەنگدان بەڕێوەدەبات.

وێنە گەورەکە: بڕیارە 11ـی تشرینی دووەمی ئەمساڵ هەڵبژاردنی پەرلەمانی عێراق بکرێت، بۆ ئەم مەبەستە کۆمیسیۆن بۆ دووەم جار پرۆسەی تاقیکردنەوەی بۆ ئامێرەکانی دەنگدان دەکات.

لێدوانی فەرمی: وەلید خالید عەباس، بەڕێوەبەری فەرمانگەی ئۆپەراسیۆنەکان لە کۆمیسیۆن، بە ڕۆژنامەی "سەباح"ـی ڕاگەیاند: پرۆسە تاقیکارییەکە بە بەشداری سەرجەم نووسینگەکانی هەڵبژاردن دەکرێت، بۆ تاقیکردنەوەی هۆکاری گواستنەوە، کە ئاماژەیە بۆ سیستمی پەیوەندییەکان و تۆڕەکان کە بۆ گواستنەوەی داتا و ئەنجامەکان لە بنکەکانی دەنگدانەوە بۆ نووسینگە ناوەندییەکانی کۆمیسیۆن بەکاردەهێنرێت." جەختیشیکردەوە کە "ئەم هەنگاوە بەشێکی سەرەکییە بۆ مسۆگەرکردنی پاکی و شەفافیەت لە پرۆسەی هەڵبژاردندا."

ئەوەی پێویستە بیزانیت: ڕۆژی 10ـی ئاب، وەکو ئامادەکارییەک بۆ پڕۆسەی دەنگدانی گشتیی، هەڵبژاردنی ئەزموونی لە عێراق بەڕێوەچوو، ڕۆژی دواتر کۆمیسیۆن سەرکەوتنی یەکەم پڕۆسەی دەنگدانی ئەزموونی و تاقیکاری ئامێرەکانی دەنگدانی ڕاگەیاند، کە تێیدا تاقیکردنەوەیەکی پێشکەوتووی کامێرای بایۆمەتریی دەموچاو ئەنجامدرا، بە ئامانجی پشتڕاستکردنەوەی ناسنامەی دەنگدەران بە وردییەکی بەرزەوە.