کۆنفرانسی نێودەوڵەتی تەندروستی خۆراک لە هەولێر بەڕێوەدەچێت

ئاڤا نیوز

بۆ وشیارکردنەوە و سەلامەتی تەندروستی هاونیشتمانیان، کۆنفرانسی نێودەوڵەتی خۆراک لە هەولێر بەڕێوەچوو.

چیرۆکی سەرەکی: ئەمڕۆ پێنجشەممە بە بەشداری 70 پزیشکی پسپۆڕ لە سەرانسەری عێراق، بە سەرپەرشتی بەڕێوەبەرایەتی گشتیی تەندروستیی هەولێر، کۆنفرانسی نێودەوڵەتیی خۆراک بەڕێوەچوو.

لێدوانی فەرمی: د. دلۆڤان محەممەد، بەڕێوەبەری گشتیی تەندروستیی هەولێر بە ئاڤا میدیای ڕاگەیاند: ئێستا خەڵکی هەرێمی کوردستان و جیهان بەگشتی گرنگی تایبەت بە بابەتی خۆراک دەدەن، بۆیە ئەو گفتوگۆیانەی لەم پانێڵەدا دەکرێن، کاریگەریان لەسەر بەرنامەی داهاتوومان دەبێت بۆ ئەوەی گرنگی زیاتر بە خۆراک بدەین.

بەڕێوەبەری گشتیی تەندروستی هەولێر دەڵێت: ئامانجی سەرەکی ئەم کۆڕبەندە وشیارکردنەوەی خەڵکە، بۆ ئەوەی بزانن چ خۆراكێک هەڵدەبژێن تا لە نەخۆشی بەدووربن.

ئەوەی پێویستە بیزانیت: کۆنفرانسی نێودەوڵەتی تەندروستی خۆراک ئەمڕۆ پێنجشەممە دەستپێدەکات و بۆ ماوەی دوو ڕۆژ بەردەوام دەبێت.