شوان کەلاری: ڕێككەوتنەكەی ئەمجارە بنەمایە بۆ مووچەی مانگەكانی دیكەش

ئاڤا نیوز

گفتوگۆکانی نێوان هەرێمی کوردستان و عێراق بۆ گەیشتن بە ڕێککەوتنی کۆتایی بەردەوامە، ئەندامێکی پەرلەمانی عێراقیش دووپاتی دەکاتەوە ڕێککەوتن بۆ مانگی حەوت و مانگەکانی دواترە.

وێنە گەورەکە: حکومەتی هەرێمی کوردستان و حکومەتی عێراق لەسەر پرسی هەناردە کردنەوەی نەوتی هەرێمی کوردستان گەیشتوونەتە ڕێککەوتنی کۆتایی و لەسەر پرسی داهاتی نانەوتیش گفتوگۆکان بەردەوامن.

لێدوانی فەرمی: شوان کەلاری، ئەندامی پەرلەمانی عێراق بە ئاڤا میدیای گوت: ڕێککەوتن بۆ مانگی شەش کراوە و ئەو مەرجانەی بۆ تەمویلکردنی مووچەی ئەو مانگە دانراون بەشێکیان پێشتر جێبەجێ کراون.

- لەسەر هەناردەکردنەوەی نەوت ڕێککەوتن کراوە، لەسەر داهاتی نانەوتیش هەنگاوی باش چوونەتە پێش.

- یەکشەممەی داهاتوو شاندی هەرێمی کوردستان دەگەڕێتەوە بەغدا بۆ چارەسەرکردنی ئەو کێشە بچووکانەی لەسەر داهاتی نانەوتی ماون.

- لەسەر مووچەی مانگی شەش ڕێککەوتن کراوە، ئەو ڕێککەوتنەی دەکرێت بۆ مانگی حەوت و مانگەکانی دواترە.

لەلایەکی دیکەوە: ئەمڕۆ سەرچاوەیەک لە وەزارەتی نەوتی عێراق بە ئاڤا میدیای گوت: ڕێکكارە هونەرییەکانی هەناردەکردنەوەوەی نەوتی هەرێمی کوردستان تەواو بوونە و لەزووترین کاتدا دەست بە هەناردەکردنەوەی دەکرێت.

باکگراوند: دوێنێ پێشەوا هەورامانی، وتەبێژی حکومەتی هەرێمی کوردستان گوتی: شاندی هەرێمی کوردستان و وەزیری دارایی عێراق گفتوگۆی پرسی پۆلێنکردنی داهاتی نانەوتی دەکەن، بۆ مووچەی مانگی شەشیش 120 ملیار دینار داهاتی نانەوتیی ئامادەیە و هەر کاتێک پێویست بکات دەخرێتە سەر هەژماری بانکی وەزارەتی دارایی عێراق.