وەزیری پەروەردەی عێراق: پلانێکی درێژخایەنمان بۆ بەکارهێنانی ژیریی دەستکرد داناوە

ئاڤا نیوز

وەزیری پەروەردەی عێراق ڕایدەگەیەنێت، "کار بۆ ئەوە دەکەین سوود لە تەکنەلۆژیا و ژیریی دەستکرد لەبەرەوپێش بردنی کەرتی پەروەردە وەربگرین، بۆ ئەم مەبەستەش پلانێکی درێژخایەنمان داناوە و ڕاهێنانیش بە مامۆستایان دەکەین".

چیرۆکی سەرەکی: ئەمڕۆ پێنجشەممە، بە بەشداری ژمارەیەک لە بەرپرسانی پەروەردەیی و پسپۆڕان و شارەزایانی پەروەردە و ژیری دەستکرد، سێیەمین کۆڕبەندی پەروەردەیی کوردستان بە سپۆنسەری ئاڤا میدیا لە هەولێر بەڕێوەدەچێت، تەوەری سەرەکی کۆڕىەندەکە بابەتی ژیریی دەستکردە.

لێدوانی فەرمی: د. ئیبراهیم جبووری، وەزیری پەروەردەی عێراق لەمیانی بەشداریکردنی لە سێیەمین کۆڕبەندی پەروەردەیی کوردستان وتارێکی پێشکەش کرد و وتی: سوپاسی حکومەتی هەرێمی کوردستان دەکەم بۆ بەڕێوەبردنی ئەم کۆڕبەندە گرنگە، ئەمە سەرەتایەکی زۆرباشە بۆ بنیاتنانی مرۆڤی هۆشیار لە هەرێمی کوردستان و عێراق.

- لە وەزارەتی پەروەردە هەوڵ دەدەین سوود لە ژیریی دەستکرد وەربگرین لە پرۆگرامەکانی خوێندن، ئەمە دەبێتە هۆی کەمکردنەوەی بەفیڕۆدانی تواناکان و سوود وەرگرتن لە تەکنەلۆژیای سەردەمیانە.

- دەمانەوێت کادیری گونجاو بۆ بازاڕی کار ئامادە بکەین، ئەم کۆڕبەندە دەتوانێت کاریگەری گەورەی لەو بوارەدا هەبێت.

- ئەم کۆڕبەندە زۆر گرنگە و بەشێکە لە هەوڵەکانی کاری هاوبەش بۆ فراوانکردنی پێکەوە کارکردن و پشتیوانیکردنی کەرتەکانی دیکە.

وەزیری پەروەردەی عێراق ئەمانەشی وت:

- ژیریی دەستکرد دەتوانێت هاوکارمان بێت لە بەرەپێشبردنی کەرتی پەروەردە، بۆیە وەبەرهێنان لەو بوارەدا دەکەین.

- کار بۆ ئەوە دەکەین ژیریی دەستکرد و تەکنەلۆژیای سەردەمییانە لە بەرەوپێشبردنی کەرتی پەروەردە بەکاربهێنین، بۆ ئەم مەبەستەش پلانێکی درێژخایەنمان داناوە و ڕاهێنان بە مامۆستایان دەکەین.

- پێویستە بۆ بەرەو پێشبردنی کەرتی پەروەردە و گەیشتن بەو ئامانجەی کاری بۆ دەکەین، دەبێت پێکەوە کاربکەین و هەماهەنگی تەواومان هەبێت.