پارێزگاری سلێمانی: شەڕ كێشەكان ئاڵۆزتر دەكات و چارەسەرەكان دوادەخات

ئاڤا نیوز

پارێزگاری سلێمانی لەسەر شەڕ و گرژییەكانی لالەزار دێتە دەنگ و دەڵێت، "شەڕ هیچ کێشەیەک چارەسەر ناکات، تەنها کێشەکان ئاڵۆزتر دەکات و چارەسەرەکان؛ دوادەخات."

چیرۆكی سەرەكی: بەرەبەیانی ئەمڕۆ شەڕ و پێكدادانی سەخت لە هۆتێل لالەزار، لەنێوان هێزەكانی یەكێتی و لاهور شێخ جەنگی، سەرۆكی بەرەی گەل هەڵگیرسا و چەكی قوورس و مامناوەند لە شەڕەكە بەكارهێنرا و زەرەر و زیانێكی زۆر بە هۆتێلەكە و دەوروبەری ئەو شوێنە كەوتووە، هاوكات ئاگرێكی گەورە لەنزیك هۆتێلەكە كەوتووەتەوە و تاكو ئێستا خامۆش نەكراوە.

لێدوانی فەرمی: د. هەڤاڵ ئەبوبەكر، پارێزگاری سلێمانی لەبارەی ڕووداوەكانی شاری سلێمانی، پەیامێکی بڵاوكردەوە و ڕایگەیاند، لە ڕابردوو و ئێستادا، بەبەردەوامیی لە هەوڵدابووین بۆ ئەوەی دۆخەکان نەگەنە ئەم دۆخە ناهەموار و نەخوازراوە، هێزی لۆژیک و لێکتێگەیشتن و یاساسەروەریی بکرێنە بنەمای یەکلاکردنەوەی هەر ناکۆکییەک، بەڵام بەداخێکی سەختەوە؛ پێشنیاز و دیالۆگ و میکانیزمە ئاشتیخوازانەکان؛ کەمترین پشتیوانیی کران.

پارێزگاری سلێمانی داواش لە هەموو لایەک دەكات هاوکاربن بۆ کۆتایهێنان بەم دۆخە نەخوازراوە و هەرجۆرە ڕووبەڕووبونەوە و بەریەککەوتنێک کە ئارامیی و ئاسایش و سەقامگیریی گشتیی دەخەنە مەترسییەوە.