دواین زانیاریی لەبارەی شەڕ و ئالۆزی بەرەبەیانی ئەمڕۆی سلێمانی

ئاڤا نیوز

بەرەبەیانی ڕۆژی هەینی دوای ڕووبەڕووبووونەوەیەکی سێ کاتژمێری، لاهوور شێخ جەنگی و خێزان و براکانی لە هۆتیل لالەزاری سلێمانی دەستگیرکران و سێ کارمەندی هێزە ئەمنییەکانیش کوژران.  

چیرۆکی سەرەکی: ڕۆژی پێنجشەممە، دۆخی سلێمانی بەهۆی جوڵەپێکردنی هێزی سەربازییەوە ئاڵۆزبوو، لە ئێوارەی هەمان ڕۆژدا میدیاکانی سەر بە یەکێتیی نیشتمانی کوردستان بڵاویانکردەوە؛ فەرمانی دەستگیرکردن بۆ لاهوور شێخ جەنگی و چەند کەسێکی دیکە دەرچووە و بۆ جێبەجێکردنی فەرمانەکەش هێزی سەربازی جوڵەی پێکراوە.

لێدوانی فەرمی: دادوەر سەڵاح حەسەن، وتەبێژی دادگای سلێمانی بە ئاڤای ڕاگەیاند: فەرمانی دەستگیركردنی لاهوور شێخ جەنگی لە ڕۆژی پێنجشەممە دەرچووە پاڵپشت بە ماددەی 56 لە یاسای سزاكانی عێراقی و یاسای تیرۆر.

ئەو بابەتە پێویستی بە ئاگاداركردنەوەی پێشوەختە نییە، بەو پێیەی ماددەكە پەیوەستە بە ڕێككەوتنی تاوانكاریی گرووپێك یاخود كۆمەڵێك كە مەترسی دەخاتە سەر تێكدانی ئەمن و ئاسایشیی گشتی.

زانیاریی زیاتر: لە نزیک کاتژمێر 12ی شەوی پێنجشەممە هێزی زیاتری سەربازی سەر بە یەکێتیی نیشتمانی کوردستان بە چەکی قورس و مامناوەندەوە لە نزیک لالەزار جێگیرکران، دواتر و لە کاتژمێر 3ی بەرەبەیانی یەکەم ڕووبەڕووبوونەوەی چەکداری لەنێوان هێزەکانی یەکێتیی و چەکدارانی لاهوور شێخ جەنگی دروستبوو و تاوەکو کاتژمێر حەوت بەردەوام بوو و کۆتاییهات. 

لەلایەکی دیکەوە: کاتژمێر 12ی شەوی ڕابردوو لاهوور شێخ جەنگی، سەرۆکی بەرەی گەل لە سلێمانی، یەکەم لێدوانی لە ڕێگەی ئاڤا میدیاوە بڵاوکردەوە و ڕایگەیاند: "جێگەی قبووڵ نییە هێزی چەكداریی حیزبی لەشوێنی دادگا و دامەزراوەی ئەمنی هەڵبكووتنە سەر شوێنی مانەوەی من و ئەمە بەهیچ جۆرێك قبووڵكراو نییە".

"بەبێ ئەوەی ئاگادار بكرێمەوە كە فەرمانی دەستگیركردنم هەیە و بەبێ هەبوونی فەرمانی دادوەر بە دەستگیركردنم، هێزێكی چەكدار دەوروبەری شوێنی مانەوەی منیان گرتووە و دووپاتیكردەوە لە ئەگەری هەر جۆرە هێرشێك، وەڵام دەدەینەوە و بەرگری لە خۆمان دەكەین".


زانیاریی پەیامنێر: چۆمان مەحموود، پەیامنێری ئاڤا لە سلێمانی ڕایگەیاند: بەهۆی ڕووبەڕووبوونەوەی چەکدارییەوە سێ کارمەندی هێزەکانی کۆماندۆی یەکێتیی و دژەتیرۆر و ئۆپەراسیۆن کوژراون و 15ی دیکەش لە هەردوولا برینداربوون.