سووریا دوو سفر لە دراوەکەی دەسڕێتەوە و چاپی نوێ دەخاتە بازاڕەوە

ئاڤا نیوز

وەک هەوڵێک بۆ گێڕانەوەی متمانە بە دراوەکەی، سووریا پلانی هەیە دوو سفر لەسەر دراوەکەی لاببات و چاپی نوێ بخاتە بازاڕەوە.

بۆچی گرنگە: ئەم هەنگاوە ئامانجی بەهێزکردنی لیرەی سوورییە لەدوای ئەو قەیرانە 14 ساڵییەی کە مانگی کانوونی یەکەمی ساڵی ڕابردوو بە ڕووخانی ڕژێمی بەشار ئەسەد کۆتایی هات.

زانیاریی بەدەستهاتوو: چەند سەرچاوەیەکی ئاگادار ڕایانگەیاند: سووریا پلانی هەیە دوو سفر لەسەر دراوەکەی لاببات و پارەی کاغەزیی نوێ بخاتە بازاڕەوە، ئەمەش وەک هەوڵێک بۆ گێڕانەوەی متمانە بە لیرەی سووری کە بەهای بە شێوەیەکی بەرچاو دابەزیوە.

زانیاریی زیاتر: تا ئێستا دیزاینی دراوە نوێیەکە ئاشکرا نەکراوە، بەڵام جەخت لەوەکراوەتەوە کە وێنەی شوێنەوار و کەسایەتییە مێژووییەکان و کولتووری سووریای لەسەر دەبێت.

ئەمەش بزانە: لیرەی سووری لەدوای دەستپێکردنی قەیرانی وڵاتەکەوە لە ساڵی 2011 داڕمانێکی گەورەی بەخۆیەوە بینیوە، بەجۆرێک کە نرخی یەک دۆلاری ئەمریکی لە 50 لیرەوە بۆ نزیکەی 10 هەزار لیرە بەرزبووەتەوە.