لە ئامێدی فێستیڤاڵی تەحین و بەرووبومە خۆماڵییەکان بەڕێوەدەچێت

ئاڤا نیوز

لە فێستیڤاڵی تەحین و بەرووبومە خۆماڵییەکان، چەندین بەرهەمی جیاوازی دەڤەرەکە بۆ سەردانیکاران خراونەتەڕوو. فێستیڤاڵەکە بە پشتیوانیی حکومەتی هەرێمی کوردستان بەڕێوەدەچێت و ئاڤا میدیا ستەیجی لەنێو فێستیڤاڵەكە هەیە و زانیاری و دیمەنەکان دەگوازێتەوە.

چیرۆکی سەرەکی: ئەمڕۆ پێنجشەممە لە ئامێدی فێستیڤاڵی تەحین و بەرووبومە خۆماڵییەکان دەستیپێکرد و سبەینێش بەردەوام دەبێت.

زانیاریی پەیامنێر: بەپێی زانیارییەکانی کاروان عەلی، پەیامنێری ئاڤا لە ئامێدی، ژمارەیەكی زۆر لە گەشتیاران و خەڵكی دەڤەرە جیاجیاكانی كوردستان ڕوویان لە فێستیڤاڵەكە كردووە، لە ژێر 100 کەپر بەرووبومی خۆماڵی، تەحین، خەبیس، هەنگوین، هەنار، شیرینی، مرەبا و چەندین بەرووبوومی وشکە و کاری دەستی  نمایش کراون.

بۆچی گرنگە: فێستیڤاڵەكە هۆكارێكی گرنگ و باشە بۆ ساغكردنەوەی بەروبوومە نێوخۆییەكانی جووتیار و دەستڕەنگینەكانی ناوچەكە، هاوكات لە ڕێگەیەوە هەلی كاریش بۆ دەیان كەس دەڕەخسێندرێت و جگە لەوەی كە كەرتی گەشتیاریی دەڤەرەكەش زیاتر دەبووژێتەوە.

ئەمەش بزانە: ئامێدی بە بەرهەمی تەحین بەناوبانگە و ساڵانە بەشێک لە جووتیاران زەوییەکانیان بە کونجی دادەچێنن و دوای دروێنەکردن و وشککردنەوەی دەیبەن بۆ ئاشەکانی ئامێدی و هەر لەوێش دەکرێت بە تەحین.