عێراق لە بڕیاری سڕکردنی موڵکەکانی حیزبوڵڵای لوبنان و حوسییەکانی یەمەن پاشگەزبووەوە

ئاڤا نیوز

حکومەتی عێراق لە بڕیاری سڕکردنی موڵکەکانی حیزبوڵڵای لوبنان و حوسییەکانی یەمەن پاشگەزبووەوە و دەڵێت، ئەو نوسراوەی ئەمڕۆ بڵاوکرایەوە کۆتا پێداچوونەوەی بۆ نەکراوە و ڕاست دەکرێتەوە، جەختیش دەکاتەوە لەوەی عێراق تەنیا ئەو لایەنانە دەخاتە لیستی سزاکانەوە کە پەیوەندییان بە داعش و قاعیدەوە هەیە.

چیرۆکی سەرەکی: لە هەنگاوێکی بێ پێشینەدا و بەتاوانی کاری تیرۆرستی، ئەمڕۆ بڕیارێکی فەرمی لیژنەی ڕووبەڕووبوونەوەی سیپیکردنەوەی پارە و پارەدارکردنی تیرۆری سەر بە حکومەتی عێراق بڵاوکرایەوە، بەگوێرەی نوسراوەکەش سزا بەسەر حیزبوڵڵای لوبنان و حوسییەکانی یەمەندا سەپێنراوە و بڕیاری بلۆککردنی سەرجەم سامان و پارە و موڵکەکانیانی دەرکراوە.

ڕاگەیێنراوی فەرمی: لیژنەی بلۆککردنی پارەی تیرۆریستانی سەر بە حکومەتی عێراق لە ڕوونکردنەوەیەکدا دەڵێت، نوسراوەکەی 17ـی مانگی ڕابردوو کە لە ڕۆژنامەی وەقائیع بڵاوکرایەوە و تێیدا ناوی ئەو کەس و لایەنانەی تێدابوو کە پەیوەندییان بە داعش و قاعیدەوە هەیە، لەسەر داوای وڵاتی مالیزیا بووە بەگوێرەی بڕیاری ئەنجوومەنی ئاسایش ژمارە 1373 ـی ساڵی 2001، بەڵام لەم نوسراوەدا ناوی هەندێک لایەنی تێدا بڵاوکراوەتەوە کە هیچ پەیوەندییان بەو دوو ڕێکخراوەوە نییە کە حکومەتی عێراق ڕەزامەندی لەسەر سەپاندنی سزا بەسەریاندا داوە.

ئەوەشی خستووەتەڕوو، بوونی ناوی قەوارە و ڕێکخراوی دیکە و بڵاوکردنەوەیان پێش پێداچوونەوە و وردبینیی بووە، بۆیەش ناوەڕۆکی نووسراوەکە ڕاست دەکرێتەوە و ناوی ئەو قەوارە و حیزبانە لادەبرێت کە پەیوەندییان بە داعش و قاعیدەوە نییە.

لەلایەکی دیکەوە: هەر ئەمڕۆ پێنجشەممەش عەممار خەلەف، جێگری پارێزگاری بانکی ناوەندی و سەرۆکی لیژنەی حکومەتی عێراق بۆ بلۆککردنی پارەی تیرۆریستان نوسراوێکی ئاراستەی ئەمیندارییەتی ئەنجوومەنی وەزیران و لیژنەی خۆیی کرد و تێیدا داوای لابردنی بڕگەی 18و 19ـی نووسراوەکەی 17ـی مانگی ڕابردووی کرد، بەهۆکاری ئەوەی لیژنەکەیان بێ مەبەست ئەو هەڵەیەی بەسەردا تێپەڕیووە و ڕاستدەکرێتەوە.

دەقی ڕوونکردنەوەکەی لیژنەی بلۆککردنی پارەی تیرۆریستان بە زمانی عەرەبی؛