مەسرور بارزانی، ڕەزامەندی لەسەر جێبەجێکردنی بەشی کۆتایی جووتسایدی هەولێر - کۆیە دا

ئاڤا نیوز

سەرۆکوەزیران، مەسرور بارزانی، ڕەزامەندی دا بە جێبەجێکردنی بەشی کۆتایی پڕۆژەی جووتسایدی هەولێر – کۆیە، ئەم بەشەی جووتسایدەکە لە هەشت کیلۆمەتر پێکهاتووە و بە گوژمەی 117ملیار دینار جێبەجێ دەکرێت.

وێنە گەورەکە: کابینەی نۆیەمی حکومەتی هەرێمی کوردستان گرنگی تایبەتی بە ژێرخانی ڕێگاوبان داوە، بە گوژمەی چوار تریلیۆن و 300 ملیار دینار، 119 پرۆژەی لە بواری ڕێگاوبان و پردی دەرەوەی شارەکان جێبەجێ کردووە.

لێدوانی فەرمی: ئەندازیار، ئاگرین عەبدوڵڵا، بریکاری وەزارەتی ئاوەدانکردنەوە و نیشتەجێکردنی هەرێمی کوردستان، بە ئاڤای گوت: سەرۆکوەزیران، مەسرور بارزانی، ڕەزامەندی دا لەسەر جێبەجێکردنی هەشت کیلۆمەتری بەشی کۆتایی پرۆژەی جووتسایدی ڕێگای سەرەکی هەولێر - کۆیە، ئەم بەشە بە گوژمەی 117 ملیار دینار جێبەجێ دەکرێت.

زانیاریی زیاتر: ئەم بەشەی ڕێگاکە بە هەمان ئەندازەی بەشەکەی دیکە دروست دەکرێت، هەر سایدێکی لە سێ لاین پێکدێت و چەند بەرزە پردێک و بڕگەی دیکە لەخۆدەگرێت.

ئەوەی پێویستە بیزانیت: بە جێبەجێکردنی ئەم بەشەی جووتسایدی هەولێر - کۆیە، لەگەڵ ئەو بەشەی ئێستا کاری تێدا دەکرێت، کۆی جووتسایدەکە دەبێتە 45 کیلۆمەتر دەگاتە سەر ڕێگای تەقتەق لە بازگەی تۆپزاوە، لە داهاتووش شەقامی 60 مەتری کۆیە دروست دەکرێت، ڕێگاکەی هەولێر - کۆیە بەناو سەنتەری شاری کۆیە دەبەستێتەوە.
 
شێوازی جێبەجێ کردن: بەشی کۆتایی پرۆژەکە بە گرێبەستێکی جیا لەلایەن هەمان ئەو کۆمپانیایە جێبەجێ دەکرێت کە پرۆژەی جووتسایدی هەولێر - کۆیە دروست دەکات.

باکگراوند: بە بڕیاری سەرۆکوەزیران، مەسرور بارزانى، پرۆژەی جووتسایدی هەولێر - کۆیە کەوتووەتە باری جێبەجێکردن،  ڕۆژانە نزیکەی 850 ئامێر و هەزار کرێکار کار لە پرۆژەکە دەکەن.