FBI هەڵیکوتایە سەر ماڵی ڕاوێژکارێکی پێشووی ترەمپ

ئاڤا نیوز

نووسینگەی لێکۆڵینەوەی فیدراڵی ناسراو بە ئێف بی ئای (FBI) هەڵیکوتایە سەر ماڵی جۆن بۆڵتن، ڕاوێژکاری پێشووی ئاسایشی نیشتمانیی ئەمریکا، کە لە دوای ڕۆیشتنی لە پۆستەکەی بووەتە یەکێک لە ڕەخنەگرە سەرسەختەکانی سەرۆکی ئەمریکا.

زانیاریی بەدەستهاتوو: بەپێی هەواڵێکی تۆڕی NBC NEWSـی ئەمریکی، پشکنینی ماڵەکەی بۆڵتن لە شاری بێثێزدا لە ویلایەتی مێریلاند، کە ڕۆژی هەینی ئەنجامدرا، بەشێک بووە لە دۆسییەکی لێکۆڵینەوەیەی ئاسایشی نیشتمانی بۆ گەڕان بەدوای بەڵگەنامە نهێنییەکاندا.

لێدوانی فەرمی: کاش پاتێل، بەڕێوەبەری FBI ڕایگەیاند، هیچ کەسێک لە سەرووی یاساوە نییە و بریکارانی FBI لە ئەرکدان.

هاوکات بەرپرسێکی دیکەی FBI ڕایگەیاند، هەڵمەتی لێکۆڵینەوەکەیان بە فەرمانی دادگا ئەنجام داوە.

لەلایەکی دیکەوە: دۆناڵد ترەمپ، سەرۆکی ئەمریکا ڕایگەیاند، هیچ زانیارییەکم لەسەر ئەو ڕووداوە نەبووە و جۆن بۆڵتنم بە دڵ نییە.

زانیاریی زیاتر: بەرپرسانی حکومەتی ئەمریکا هێشتا هیچ وردەکارییەکیان لەبارەی هۆکاری پشکنینەکە و ئەو تۆمەتانەی کە ڕەنگە ڕووبەڕووی بۆڵتن بکرێنەوە، بڵاونەکردووەتەوە.

ئەوەی پێویستە بیزانیت: بەگوێرەی ڕۆژنامەی نیویۆرک تایمز، لێکۆڵینەوەکان سەبارەت بەوەی ئایا بۆڵتن بە نایاسایی زانیاریی نهێنی بڵاوکردووەتەوە یان لای خۆی هەڵیگرتووە دەستیپێکردووە.

باکگراوند: جۆن بۆڵتن لە ماوەی کارکردنیدا وەک ڕاوێژکار، بەردەوام لەسەر سیاسەتی دەرەوەی ئەمریکا پەیوەست بە ئێران و کۆریای باکوور لەگەڵ سەرۆکی ئەمریکا ناکۆکی هەبوو. وەک ڕاوێژکارێکی تووندڕەو سەیر دەکرا و ترەمپ پێشتر ڕەخنەی لێگرتبوو و بە جەنگخواز ناوی بردبوو، چونکە هانیداوە بۆ ئەنجامدانی کردەوەی سەربازی دژی ئێران، بەڵام لە ساڵی 2019ـدا دوای 17 مانگ لە دەستبەکاربوونی لەلایەن ترەمپەوە لە پۆستەکەی دوورخرایەوە.