وەزارەتی بازرگانی: ئەو هاووڵاتییانەی بەشە ئاردیان بڕاوە قەرەبوو ناکرێنەوە

ئاڤا نیوز

بۆ دابەشکردنی حەوتەم بەشەئاردی ئەمساڵ، بەشەئاردی 800 هەزار هاووڵاتی هەرێمی کوردستان بڕا، وەزارەتی بازرگانی جەخت لەوە دەکاتەوە ئەوانەی خۆیان تۆمارکردووە بەشە ئاردی داهاتوو وەردەگرن.

چیرۆکی سەرەکی: بەهۆی تۆمارنەكردنیان لە فۆڕمی ئەلیكترۆنی خۆراك، بە بڕیاری وەزارەتی بازرگانیی عێراق، بەشە ئاردی زیاتر لە 800 هەزار هاووڵاتیی هەرێمی كوردستان بڕدرا ئەوانەی تاوەکو ئێستا خۆیان تۆمارنەکردووە، بەشە ئاردی هەشتەمیش وەرناگرن.

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازی بە ئاڤای گوت، "ئەو هاووڵاتیانەی کە بەشە ئاردیان بڕابوو قەرەبوو ناکرێنەوە، بەڵام ئەگەر خۆیان تۆمارکردبێت بەشە ئاردی هەشتەم وەردەگرن."

ژمارەکان وادەڵێن: دوو ڕۆژ وەک دوایین وادە لەبەردەم هاووڵاتییان ماوە بۆ ئەوەی ناوی خۆیان لە پسوولەی خۆراکی ئەلیکترۆنی تۆماربکەن، تاوەکو ئەمڕۆ 85٪ـی هاووڵاتیانی هەرێمی کوردستان ناوی خۆیان تۆمارکردووە. ڕێژەی تۆمارکردنی پارێزگاکان بەمشێوەیە:-

هەولێر: 87٪
سلێمانی: 85٪
دهۆک: 81٪
هەڵەبجە: 89٪ا