مەسەدە: سیاسەتی یەکڕەنگی ڕەتدەکەینەوە و پشتیوانی هەمەڕەنگی دەکەین

ئاڤا نیوز

ئەنجوومەنی سووریای دیموکرات (مەسەدە) دەڵێت، زاڵکردنی باوەڕێکی ئاینیی دیاریکراو و بەردەوامی پەراوێزخستنی لایەن و پێکهاتەکان، دوو ئاستەنگی گەورەن لەبەردەم ڕێککەوتنەکەی 10ـی ئازار، جەختیش دەکاتەوە لەوەی سیاسەتی یەکڕەنگی ڕەتدەکاتەوە و پشتیوانیی هەمەڕەنگی لە سووریادا دەکات.

ڕاگەیێنراوی فەرمی: ئەنجوومەنی سووریای دیموکرات (مەسەدە) کە چەتری سیاسی دەیان لایەنی سیاسی کوردیی و پێکهاتەکانی دیکەی ڕۆژئاوای کوردستانە، ئەمڕۆ لە حەسەکە کۆڕبەندێکی لەبارەی جێبەجێکردنی ڕێککەوتنەکەی 10ـی ئازار سازکرد و ئاماژەی بەوەکرد، سیاسەتی یەک ڕەنگی دیاریکراو ڕەتدەکەنەوە و هۆشدارییش لە بەردەوامی پەراوێزخستن لەسەر بنەمای باوەڕی ئاینیی دەدەن، کە دوو ئاستەنگی گەورەن لەبەردەم تێکەڵبوونەوەی هەسەدە و ئیدارەی خۆسەر لەگەڵ دیمەشق.

زانیاریی زیاتر: مەسەدە داواش دەکات سووریایەکی دیموکراسی و ناناوەندی بە بەشداری هەموو سوورییەکان بوونیاد بنرێت، جەختیش دەکاتەوە بۆ ئەم داواکارییانە هەسەدە و ئیدارەی خۆسەر، پشتیوانییەکی فراوانی شەقامیان لە باکوور و ڕۆژهەڵاتی سووریا لەگەڵ دایە.

باکگراوند: ڕۆژی 2025-03-10 ئەحمەد شەرع،  سەرۆكی كاتی سووریا و مەزڵووم عەبدی، فەرماندەی گشتی هێزەكانی سوریای دیموكرات 'هەسەدە' ڕێککەوتنێکی مێژوویان واژۆکرد، بەگوێرەی ڕێککەوتنەکەش هەسەدە دەبێتە بەشێک لە وەزارەتی بەرگری سووریا و دەوڵەتی سووریاش هەموو مافەکانی کورد گەرەنتی دەکات.