هۆشداری بە بریکارەکانی خۆراک دەدرێت

ئاڤا نیوز

پڕۆسەی بە ئەلیکترۆنیکردنی فۆرمی خۆراک لە کوردستان و عێراق بەردەوامە و هۆشداری بە بریکارەکانی خۆراک دەدرێت، کە ئاگاداری وەتسئەپ و تیلیگرامەکانیان بن.

وێنە گەورەکە: لە هەرێمی کوردستان و عێراق پرۆسەی وەرگرتنی بەشەخۆراکی مانگانە بە ئەلیکترۆنی دەکرێت، هاونیشتمانیان لە ڕێگەی ئەپێکی تایبەتەوە بەشەخۆراک وەردەگرن، هەروەها ڕۆتیناتی کاغەزی بۆ بەڕێکردنی مامەڵەی هاووڵاتیان لەلای بریکارەکان نامێنێت، تاوەکو ئێستاش 85%ـی هاونیشتمانیان خۆیان لە پرۆسەکە تۆمار کردووە.

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازی بە ئاڤای ڕاگەیاند: پێویستە بریکارەکانی خۆراک بەزووترین کات ئەپڵیکەیشنی وەتسئەپ و تیلیگرام لەسەر مۆبایلەکانیان دابەزێنن، چونکە لەم مانگەوە لیستی ئارد و خۆراک لە ڕێگەی ئەم دوو ئەپلیکەیشنەوە بەشێوەی PDF بۆ بریکارەکانی خۆراک دەنێردرێت.

زانیاریی زیاتر: تاوەکو هاونیشتمانیان بەشە خۆراکەکەیان وەرنەگرن، بەرپرسیارەتییەکەی لەسەر بریکارەکانی خۆراکە، ئەگەر لە دوو مانگیشدا هاووڵاتیان سەردانی بریکارەکەیان نەکەن و بەشە خۆراکەکەیان وەرنەگرن، ئەوا ڕادەگیرێت تا ئەو کاتەی هۆکارەکەی ڕوون دەکرێتەوە، چونکە چیتر بەشە خۆراک لەلای بریکار هەڵناگیرێت و دەگەڕێتەوە بۆ کۆگاکان.

بۆچی گرنگە: بە ئەلیکترۆنیکردنی پسوولەی خۆراک ڕوتیناتی کاغەزی بۆ دابەشکردنی خۆراک بەسەر هاووڵاتیاندا نامێنێت، ئەمەش ڕێکارەکانی دابەشکردنی خۆراک خێراتر دەکات.

ئەوەی پێویستە بیزانیت: لە ڕابردوو دا دەبوو لە بەڕێوەبەرایەتیی پسوولەی خۆراک پسوولەکان چاپ بکرێن، ڕەوانەی بەڕێوەبەرایەتیی بازرگانیی خۆراک و بەڕێوەبەرایەتیی دروستکردنی دانەوێڵە بکرێن، ئەوانیش لیستەکانیان ڕادەستی بریکارەکانی خۆراک دەکرد و بەشەخۆراکی مانگانە بە هاووڵاتیان دەدرا.