فایلی خەڵك؛ هەزاران پێشمەرگەی دێرین چاوەڕوانی مووچەی خانەنشینی دەکەن

ئاڤا نیوز

ژمارەیەک پێشمەرگەی ئەیلوول و گوڵان داوای تەواوکردنی مامەڵەی خانەنشینیان دەکەن، بەڕێوەبەری ئیداریی دەزگای ئەیلوول لەوبارەیەوە دەڵێت 'مامەڵەکانیان بۆ ئەنجوومەنی وەزیران بەرزکراوەتەوە'.

چیرۆکی سەرەکی: ژمارەیەک لە پێشمەرگەکانی شۆڕشی ئەیلوول و گوڵان داوای تەواوکردنی مامەڵەی خانەنشینیان دەکەن، کە ماوەیەکی زۆرە تەواو بووە، بەڵام تا ئێستا مووچەیان بۆ نەبەستراوە.

لێدوانی فەرمی: پێشمەرگەیەکی شۆڕشی ئەیلوول لە قەزای چەمچەماڵەوە بە ئاڤای ڕایگەیاند، زیاتر لە هەزار پێشمەرگەی شۆڕشی ئەیلوول لە ساڵی 2012ـەوە مامەڵەی خانەنشینیان بۆ کراوە، بەڵام تاوەکو ئێستا مووچەیان وەرنەگرتووە. ئەو پێشمەرگەیە داوا دەکات کە دەنگیان بە لایەنە پەیوەندیدارەکان بگەیەندرێت و بەدواداچوون بۆ کێشەکەیان بکرێت.

بۆچوونی لایەنی بەرامبەر: عەبدولڕەحمان ئەحمەد، بەڕێوەبەری ئیدارەی دەزگای ئەیلوول، بۆ ئاڤا پشتڕاستی کردەوە کە مامەڵەی دوو هەزار پێشمەرگەی شۆڕشی ئەیلوول و هەزار پێشمەرگەی شۆڕشی گوڵان لەلایەن ئەوانەوە تەواو بووە و بۆ بڕیاری کۆتایی ڕەوانەی ئەنجوومەنی وەزیران کراوە.

زانیاریی زیاتر: ناوبراو هۆکاری دواکەوتنەکەی گەڕاندەوە بۆ ڕاگیرانی پرۆسەی دامەزراندن و زیادکردنی خانەنشین لەلایەن حکومەتەوە و وتی: "مامەڵەی ئەو سێ هەزار پێشمەرگەیە بۆ ئەنجوومەنی وەزیران بەرزکراوەتەوە، ئومێد دەکەین بۆ ساڵی داهاتوو یەکلایی بکرێتەوە، چونکە ئەمساڵ دامەزراندن و زیادکردنی خانەنشینی ڕاگیراوە، تاوەکو ساڵی 2026 هیچ ناکرێت."