ناوچەیەکی سووریا دامەزراندنی سوپای تایبەت بە خۆی ڕادەگەیێنێت

ئاڤا نیوز

گرووپە چەکدارەکانی پارێزگای سوەیدا لە باشووری سووریا پێکهێنانی سوپایەکی هاوبەشیان بەناوی "هێزی پاسەوانی نیشتیمان" ڕاگەیاند و دەڵێن، پابەندی بڕیارەکانی حیکمەت هیجری ڕێبەری ڕووحی دروزەکانی سووریا دەبن.

وێنە گەورەکە: پارێزگای سوەیدا لە باشووری سووریا زۆرینەی دانیشتووانەکەی پێکهاتەی درووزیین و جگە لە پشتیوانی ئیسرائیل، لە شەڕ و پێکدادانەکانی مانگی تەمموزی ئەمساڵیان لەگەڵ هێزەکانی سەر بە حکومەتی سووریا، لە ئاستی نێودەوڵەتیش  هاوسۆزییەکی زۆریان بەدەستهێنا و بەهۆیەوە سوپای سووریا ناچاربوو لە ناوچەکانیان پاشەکشە بکات.

ڕاگەیێنراوی فەرمی: بە واژۆی 28 گرووپی چەکداری، ئەمڕۆ شەممە "هێزی پاسەوانی نیشتیمان" لە پارێزگای سوەیدا ڕاگەیێنرا، لە ڕاگەیێنراوی دامەزراندنی سوپاکەدا هاتووە، ئەوان پابەندن بە فەرمانەکانی حیکمەت هیجری، ڕێبەری رووحی دروزەکان و ناوبراو نوێنەری شەرعییانە بۆ گوزارشت لە بۆچوونی گشتی پێکهاتەکەیان، ئەرکیشیان پاراستنی ناوچەی جەبەل و ناسنامەی ناسراوی دروزەکانە.

باکگراوند: 16ـی ئابیش سەدان کەس لە ناوەندی شاری سوەیدای باشووری سووریا لە ژێر ناونیشانی "مافی چارەنوس" خۆپیشاندانیان سازکرد و ڕایگەیاندبوو، ئەوان بە ناناوەندی دەسەڵات و ئیدارەی خۆسەرییش ڕازی نین و داوای جیابوونەوەی تەواوەتی لە سووریا دەکەن.