بەرێوەبەرایەتیی خۆسەر هەڵبژاردنەکانی سووریا ڕەتدەکاتەوە: "نادیموکراسییە و نوێنەرایەتیی گەلی سووریا ناکات"

ئاڤا نیوز

بەرێوەبەرایەتیی خۆسەری دیموکراتی باکوور و ڕۆژهەڵاتی سووریا، هەڵبژاردنەکانی داهاتووی سووریا بە تووندی ڕەت دەکاتەوە و دەڵێت، ئەو پرۆسەیە "نادیموکراسییە و بە هیچ شێوەیەک گوزارشت لە ئیرادەی گەلی سووریا ناکات".

 

وێنە گەورەکە: پێشبینی دەکرێت یەکەم پرۆسەی هەڵبژاردنی ئەنجوومەنی گەل لەنێوان 15 و 20ی ئەیلوولی ئەمساڵ لە سووریا بەڕێوەبچێت. وتەبێژی فەرمیی کۆمیسیۆنی باڵای هەڵبژاردنەکان لە سووریا ڕایگەیاند، کۆمیسیۆن بڕیاری داوە بە دواخستنی ئەنجامدانی هەڵبژاردنی پەرلەمان لە پارێزگاکانی ڕەققە و حەسەکە و سوەیدا بەهۆی بارودۆخی ئەمنییەوە.

 

ڕاگەیێنراوی فەرمی: بەرێوەبەرایەتیی خۆسەر لە ڕاگەیێنراوێکدا ئاماژە بۆ ئەوە دەکات، ئەم هەنگاوە درێژەپێدەری هەمان سیاسەتی پەراوێزخستن و دوورخستنەوەیە کە گەلی سووریا بۆ ماوەی 54 ساڵ لەژێر دەسەڵاتی بەعسدا چەشتوویەتی. دەڵێت: ئەم پرۆسەیە نزیکەی نیوەی سوورییەکان لە بەشداری بێبەش دەکات، چ بەهۆی کۆچی زۆرەملێوە بێت یان لە ڕێگەی سیاسەتی سیستماتیکەوە بۆ ڕێگری کردن لە بەشداریی پێکهاتە و هێزە کاریگەرەکان.

 

کاریگەریی و لێکەوتەکان: بەرێوەبەرایەتیی خۆسەر ئەو پاساوە ڕەت دەکاتەوە کە گوایە ناوچەکانی باکوور و ڕۆژهەڵاتی سووریا "نائارامن" و بۆیە لە هەڵبژاردن دوورخراونەتەوە. لە ڕاگەیێنراوەکەدا جەخت کراوەتەوە کە "ئەم بانگەشەیە دوورە لە ڕاستییەوە، چونکە ناوچەکانی ئێمە لەچاو ناوچەکانی دیکەی وڵاتدا ئارامترینن" و ئەمە تەنیا بیانوویەکە بۆ نکۆڵیکردن لە مافی زیاتر لە پێنج ملیۆن هاووڵاتی.

 

لەکۆتاییدا، بەرێوەبەرایەتیی خۆسەر ڕایگەیاندووە، پابەندی هیچ بڕیارێک نابن کە بە عەقڵییەتێکی تاکڕەوانە سەپێنرابێت و مافی پێکهاتەکان پشتگوێ بخات. داوایان لە نەتەوەیەکگرتووەکان و کۆمەڵگەی نێودەوڵەتی کردووە دان بەم هەڵبژاردنانەدا نەنێن، چونکە پێچەوانەی بڕیاری 2254ی ئەنجوومەنی ئاسایشە.

چارەسەرەکان: بەرێوەبەرایەتیی خۆسەر دووپاتی دەکاتەوە کە چارەسەری ڕاستەقینە لە سووریادا بە دووبارەکردنەوەی سیاسەتە کۆنەکان نابێت، بەڵکو لە ڕێگەی پرۆسەیەکی سیاسیی گشتگیرەوە دەبێت کە هەموو سوورییەکان تێیدا بەشدار بن بۆ گەیشتن بە سووریایەکی دیموکراسی، فرەیی و لامەرکەزی.