نەرویج سیستمی بەرگریی ئاسمانی بۆ ئۆکراینا دابین دەکات

ئاڤا نیوز

لە هەوڵە بەردەوامەکان بۆ پشتگیرییکردنی ئۆکراینا لەشەڕی دژ بە ڕووسیا، حکومەتی نەرویج بە بەهای نزیکەی 700 ملیۆن دۆلار سیستەمی بەرگریی ئاسمانی بۆ ئۆکراینا دابین دەکات.

زانیاریی بەدەستهاتوو: حکومەتی نەرویج ئاشکرای کرد، لەگەڵ حکومەتی ئەڵمانیا ڕێککەوتوون بۆ کڕینی دوو سیستمی مووشەکی بەرگریی ئاسمانی پاتریۆت و گەیاندنی بە کیێڤ، جۆناس گاهر ستۆر، سەرۆکوەزیرانی نەرویج لە بەیاننامەکەدا ڕایگەیاندووە، “لەگەڵ ئەڵمانیا ئێستا دڵنیا دەبینەوە لەوەی ئۆکرانیا سیستەمی بەرگری ئاسمانی بەهێز وەردەگرێت''.

زانیاریی زیاتر: ئەمە لە کاتێکدایە، ئەڵمانیا و نەرویج زۆر لە نزیکەوە کاردەکەن بۆ پاڵپشتیکردنی ئۆکراینا  لە شەڕی بەرگریکردن لە بەرامبەر هێرشە ئاسمانییەکانی ڕووسیا.

لەلایەکی دیکەوە: ئەم بڕیارەی نەرویج لەکاتێکدایە، سەرۆکی ئەمریکا، سیاسەتێکی نوێ بەرامبەر بە ئۆکراینا لە بواری سەربازیدا پەیڕەو دەکات، کە ڕێگە نادات ئۆکراینا مووشەکە بەرهەمهێنراوەکانی ئەمریکا بۆ ئامانجەکانی ناو ڕووسیا بەکاربهێنێت، ئامانج لەو سیاسەتە نوێیەیە فشاری زیاترە بۆ پرسی دانوستانەکانی ئاشتی نێوان ڕووسیا و ئۆکراینا بۆ کۆتاییهێنان بە جەنگی سێ ساڵەی نێوانیان.