جگە لە هەرێمی کوردستان؛ لە پارێزگاکانی عێراق لە مانگێكدا نزیكەی حەوت هەزار تەڵاق تۆمارکراون

ئاڤا نیوز

لە پارێزگاكانی عێراق، تەنیا لە یەك مانگدا، شەش هەزار و 910 جیابوونەوەی هاوسەران (تەڵاق) تۆماركراوە، ئەمەش هەڵكشانێكی مەترسیداری هەڵوەشاندنەوەی خێزانە كە ئێستا عێراق پێیوە دەناڵێنێت.

ڕاگەیێنراوی فەرمی: بەگوێرەی ڕاگەیێنراوی فەرمیی ئه‌نجوومه‌نى باڵاى دادوه‌رى له‌ عێراق كە ئه‌مڕۆ یه‌كشەممە 24ـی ئابی 2025، بڵاوكراوەتەوە، لەنێو 15 پارێزگای عێراقدا، زۆرترین جیابوونەوە لە شاری بەغدا تۆماركراوە، بەجۆرێك لە ڕەسافە هەزار و 299 و لە بەری كەرخ هەزار و 166 جیابوونەوە تۆماركراوە" بەسرە لە پلەی دووەمی ڕیزبەندییەكەیە بە تۆماركردنی 734 جیابوونەوە و مووسڵیش بە پلەی سێیەم دێت كە 580 تەڵاقی تێدا تۆماركراوە.

هۆكارەكان چین: بەپێی بەدواداچوونەكانی ئاڤا میدیا بەپشتبەستن بە توێژینەوە و دیراسەی دەزگا دادوەرییەكان، هۆكارە سەرەكییەكانی هەڵكشانی ڕێژەی تەڵاق؛ نەگونجان لەگەڵ یەكتر بەهۆی جیاوازی تەمەن، خیانەتی هاوسەرگیری، خراپی دۆخی ئابووری و نەبوونی ماڵی جیا و دەستوەردانی خزم و کەسانی دەوروبەر، مۆبایل و ئینتەرنێت و ئاڵوودەبوون بە ماددەی هۆشبەرن، لەگەڵ ژمارەیەك هۆكاری دیكەی لاوەكی.

ژمارەکان وادەڵێن: ئه‌نجوومه‌نى باڵاى دادوه‌رى له‌ عێراق ئامارى مانگانەی ڕێژەی هاوسه‌رگیرى و جیابوونه‌وه‌ى هاوسه‌رانى لە 15 پارێزگا جگە لە پارێزگاكانی هەرێمی كوردستان بڵاوكردووه‌ته‌وه‌، له‌ ئاماره‌كەدا‌ هاتووه‌ له‌ مانگى ته‌مموزدا؛ 22 هەزار و 677 گرێبه‌ستى هاوسه‌رگیرى كراوه‌، له‌ به‌رانبه‌ردا شه‌ش هه‌زار و 910 جیابوونه‌وه‌ ڕوویداوه‌.