کۆمیسیۆن لەبارەی ژیریی دەستکرد هۆشداری دەداتە کاندیدان

ئاڤا نیوز

کۆمیسیۆنی باڵای سەربەخۆی هەڵبژاردنەکان، هۆشداری بەکارهێنانی نەرێنی ژیریی دەستکرد لەلایەن کاندیدانی هەڵبژاردنەکانەوە دەدات و دەڵێت، "ئەو کارە بە سەرپێچی دادەنرێت و دەگاتە ئاستی تاوانی هەڵبژاردن ".

 

وێنە گەورەکە: بڕیارە 11-11-2025، هەڵبژاردنی خولی شەشەمی پەرلەمانی عێراق بەڕێوەبچێت، ئامادەکارییەکانیش لەلایەن کۆمیسیۆنەوە بەردەوامە.

 

لێدوانی فەرمی: حەسەن سەلمان، ڕاوێژکاری یاسایی کۆمیسیۆنی باڵای سەربەخۆی هەڵبژاردنەکانی عێراق، ڕایگەیاند: پرسی ژیریی دەستکرد و بەکارهێنانی بۆ تێکدانی باری کۆمەڵایەتیی و شکاندنی کەسایەتیی کاندیدانی دیکە، بە یەکێک لەو سەرپێچییانە دادەنرێت کە دەگاتە ئاستی تاوانی هەڵبژاردن، کە بەپێی یاسا سزا و لێکەوتەی دیاری کراوی لەسەر دەبێت.

 

زانیاری زیاتر: سەلمان، ئاماژەی بەوەشکرد، بۆ دیاری کردن و دڵنیا بوونەوە لە بەکارهێنانی ژیریی دەستکرد لەلایەن کاندیدانەوە،  پشت بە پسپۆڕانی تەکنیکی دەبەسترێت.