كوێت خواستی پێشخستنی پەیوەندییەكانی لەگەڵ هەرێمی كوردستان دووپات دەكاتەوە

ئاڤا نیوز

باڵیۆزی كوێت لە عێراق، خواستی وڵاتەكەی بۆ زیاتر پێشخستنی پەیوەندییەكانی لەگەڵ هەرێمی كوردستان و عێراق دووپاتدەكاتەوە. هەردوولا كۆك بوون لەسەر پاراستنی ئاشتی و ئارامی لە ڕۆژهەڵاتی ناوەڕاستدا.

چیرۆكی سەرەكی: سەفین دزەیی، بەرپرسى پەیوەندییەکانى دەرەوەى حکومەتی هەرێمی كوردستان، پێشوازى لە حەسەن محەممەد زەمان، باڵیۆزى وڵاتى کوێت لە عێڕاق، و فەیسەڵ فەهد شرێدە، هەڵسووڕێنەرى کاروبارى کونسوڵگەریی گشتیى کوێت لە هەرێمی كوردستان کرد و، هەردوولا باسیان لە پتەوكردنی پەیوەندییە دووقۆڵییەكان و دۆخی ناوچەكە و پەیوەندییەكانی نێوان هەولێر و بەغدا كرد.

ڕاگەیێنراوی فەرمی: بەپێی ڕاگەیێنراوی فەرمانگەی پەیوەندییەكانی دەرەوەی حکومەتی هەرێمی كوردستان، سەفین دزەیی، سیاسەت و تێڕوانینی حکومەتی هەرێمی كوردستانی لەبارەی سەرجەم پرس و پێشهاتەکان بۆ باڵیۆزی کوێت لە عێراق خستە ڕوو، دواتر باسیان لە دوایین پێشهاتەکان لە ناوچەکە کرد و هەردوولا کۆکبوون لەسەر گرنگی پاراستنی ئارامی و سەقامگیریی ناوچەکە؛ هیوایان خواست کۆمەڵگەی نێودەوڵەتی بە بایەخەوە بڕوانێتە بەرقەرارکردنی ئاشتی لە ڕۆژهەڵاتی ناوەڕاستدا.

لەلایەكی دیكەوە: باڵیۆزی کوێت لە عێراق، خواستی وڵاتەکەی بۆ زیاتر پێشخستنی پەیوەندییەکانیان لەگەڵ هەرێمی کوردستان و تەواوی عێڕاق دووپات کردەوە؛ بە تایبەتی لەو بوارانەی جێگەی بایەخی هەردوولایە.