سەرۆک ئەرکانی ئیسرائیل: داگیرکردنی کەرتی غەززە مەترسی بۆ سەر بارمتەکان دروست دەکات

ئاڤا نیوز

سەرۆک ئەرکانی ئیسرائیل مەترسییەک بە نەتانیاهۆ ڕادەگەیەنێت و دەڵێت: داگیرکردنی تەواوی کەرتی غەززە دەبێتە هۆی دروستکردنی مەترسی لەسەر گیانی بارمتەکان. 

چیرۆکی سەرەکی: ئیال زەمیر، سەرۆکی ئەرکانی ئیسرائیل، داوای لە بنیامین نەتانیاهۆ، سەرۆکوەزیرانی ئیسرائیل کرد پێشنیازی ئێستا بۆ ئاڵوگۆڕی زیندانییەکان قبووڵ بکات و هۆشداریشیدا لەوەی کە داگیرکردنی شاری غەززە مەترسی جددی لەسەر ژیانی بارمتەکان دروست دەکات.

ئەوەی پیویستە بیزانیت: ئەوە لە کاتێکدایە ڕۆژی پێنجشەممە، نەتانیاهۆ فەرمانی دا دانوستانی خێرا بۆ ئازادکردنی هەموو بارمتەکان بکرێت، کە لە هەمان کاتدا بەردەوامە لە پلانەکانی داگیرکردنی شاری غەززە و گواستنەوەی دانیشتووانەکەی.

لێدوانی فەرمی: سەرۆکی ئەرکانی ئیسرائیل نیگەرانییەکانی خۆی لەبارەی پلانی داگیرکردنی شاری غەززە نوێکردەوە و ڕایگەیاند، " گرێبەستێک لەسەر مێزەکە هەیە، پێویستە ئێستا وەربگیرێت" و  "سوپا مەرجەکانی بۆ تەواوکردنی دابینکردووە، بڕیارەکەش ئێستا لە دەستی نەتانیاهۆدایە"، ئاماژەی بەوەشکرد، سوپا توانای داگیرکردنی غەززەی هەیە، بەڵام ئەو ئۆپەراسیۆنە دەتوانێت ژیانی بارمتەکان بخاتە مەترسییەکی جددی.