ئاسایش بکوژی هاووڵاتییەکەی بازاڕی عەلوەی هەولێر دەستگیر دەکات

ئاڤا نیوز

ئاسایشی هەولێر دەستگیرکردنی چەند کەسێک ڕادەگەیێنێت کە تۆمەتبارن بە کوشتنی ئەو کرێکارەی ئەمڕۆ  لە عەلوەی شاری هەولێر کوژرا.

چیرۆکی سەرەکی: ئەمڕۆ سێ شەممە 26-8-2025، لە ڕوداوێکی تەقەکردندا لە بازاڕی عەلوەی شاری هەولێر هاووڵاتییەکی عەرەب بەناوی "سعب عاید سمر" کە پیشەی کرێکارە، کوژرا و دەستبەجێ لەلایەن تیمەکانی بەڕێوەبەرایەتیی ئاسایشی هەولێرەوە لێکۆلینەوە لە ڕووداوەکە و دەستگیرکردنی تۆمەتباران دەستپێکرا، دوای چاودێری و گەڕان دەستگیرکران.

ڕاگەیێنراوی فەرمی: بەڕێوەبەرایەتیی ئاسایشی هەولێر ڕایگەیاند، "دوای ڕووداوەکە دەستبەجێ لەلایەن تیمەکانمانەوە دەست بە ئەنجامدانی بە دواداچوون کرا، دەرکەوت تۆمەتبارەکان لە چوار کەس پێکهاتوون و دوای ئەنجامدانی تاوانەکەیان بەرەو دەرەوەی شاری هەولێر هەڵاتوون، بە هەماهەنگی لەگەڵ بەڕێوەبەرایەتیی ئاسایشی بازگەکانی هەولێر، دوای وەر گرتنی ڕەزامەندیی دادوەری لێکۆڵینەوەی ئاسایشی هەولێر، تۆمەتبارەکانمان دەستگیر کرد.

تۆمەتبارەکان بەناوەکانی (ز، خ، س) و (س، د، س) و (ح، خ، س) و (م، ع، د) لە نەتەوەی عەرەبن و نیشتەجێی ناحیەی ڕەبیعەن لە پارێزگای مووسڵ.

هۆکارە زانراوەکان: بەپێی ڕاگەیێنراوەکەی ئاسایشی هەولێر، هۆکاری کوشتنی ئەو کرێکارە عەرەبە بۆ کێشەیەکی کۆمەڵایەتی دەگەڕێتەوە کە لە ساڵی 2020 ئەم تاوانەیان ئەنجامداوە، لەدوای ئەنجامدانی تاوانەکەیان بەنیازبوون بگەڕێنەوە ناوچەکەی خۆیان. هاوکات "لەکاتی دەستگیرکردنیاندا دەستمان گرت بەسەر ئەو چەک و ئۆتۆمبێلەی تاوانەکەیان پێ ئەنجامداوە".