وەزارەتی دەرەوەی پاکستان: چەند بارەگایەکی تیرۆریستانمان لە ئێران کردووەتە ئامانج

ئاڤا دیجیتاڵ 

 

بەرەبەیانی ئەمڕۆ پێنجشەممە، پاکستان لە وەڵامی هێرشەکانی ئێران بۆ سەر وڵاتەکەی، چەند مووشەکێکی ئاراستەی ئێران کرد و"حەوت کەس کوژراون".

 

چیرۆکە سەرەکییەکە: بەرەبەیانی ڕۆژی سێشەممە سوپای پاسدارانی ئێران چەند مووشەكێكیان ئاراستەی پاكستان کرد و بەهۆیەوە چوار كەس كوژران، لە وەڵامی ئەو هێرشە مووشەکییانەدا، بەرەبەیانیی ئەمڕۆ پێنجشەممە 18-01-2024 پاکستان چەند هێرشێکی مووشەکی ئاراستەی چەند ناوچەیەکی ئێران کردووە و "بەهۆیەوە حەوت کەس کوژراون".

 

لێدوانە فەرمییەکان: "لە ماوەی چەند ساڵی ڕابردوودا هەمیشە لە پەیوەندیمان لەگەڵ ئێران نیگەرانبووینە، سەبارەت بەو پەناگانەی تیرۆریستانی بە ڕەچەڵەک پاکستانی خۆیانیان تێدا شاردووەتەوە". وەزارەتی دەرەوەی پاکستان لە ڕاگەیێنراوێکدا وای گوت. 

 

زانیاریی زیاتر: "بەهۆی نەبوونی چالاکییەکان لەسەر نیگەرانییەکانمان، ئەم "تیرۆرستانە" بەبێ سزا بەردەوامبوون لە ڕشتنی خوێنی پاکستانییە بێتاوانەکان، ئەم هێرشەی ئەمڕۆ دەرکەوتەی ئیرادەی نەگۆڕی پاکستانە بۆ پاراستن و بەرگریکردن لە ئاسایشی نیشتمانی. پاکستان لەبەرامبەر هەموو هەڕەشەکان، بەردەوام دەبێت لە گرتنەبەری هەموو هەنگاوە پێویستەکان بۆ پاراستنی سەلامەتی و ئاسایشی گەلەکەی".

 

لەلایەکی دیکەوە: وەزارەتی دەرەوەی پاکستان "بەتەواوی ڕێز لە سەروەری و یەکپارچەیی خاکی کۆماری ئیسلامی ئێران دەگرێت" و ڕایگەیاندووە: "تاکە ئامانجی ئەم کردەوەیەی ئەمڕۆ بەدواداچوون بوو بۆ ئاسایش و بەرژەوەندیی نیشتمانیی پاکستان کە لە پێش هەموو شتێکەوەیە و ناتوانرێت سازشی لەسەر بکرێت، چونکە پاکستان چەند بارەگایەکی تیرۆرستانی لە ئێران کردووەتە ئامانج".

 

"پاکستان وەک ئەندامێکی بەرپرسیار لە کۆمەڵگەی نێودەوڵەتیدا، بنەما و ئامانجەکانی جاڕنامەی نەتەوەیەکگرتووەکان لەوانەش، یەکپارچەیی خاک و سەروەریی وڵاتانی ئەندام دەپارێزێت. بە ڕێنمایی ئەم بنەمایانە و بە بەکارهێنانی مافە ڕەواکانمان لە چوارچێوەی یاسا نێودەوڵەتییەکان، پاکستان هەرگیز ڕێگە نادات سەروەری و یەکپارچەیی خاکی خۆی بخرێتە بەر هەڕەشە، لەژێر هەر بیانوویەک یان بارودۆخێکدا". لە کۆتایی ڕاگەیێنراوەکەی وەزارەتی دەرەوەی پاکستاندا واهاتووە.

 

باکگراوند: پاکستان و ئێران بەردەوام یەکتر بەوە تۆمەتبار دەکەن لەسەر سنوورەکان ڕێگە بە گرووپە چەکدارەکان دەدەن جموجۆڵ بکەن، ئەمەش وایکرد گرژییەکانی نێوانیان پەرەبسەنێت و بە مووشەک ڕووبەڕووی یەکتر ببنەوە.