وەزارەتی دارایی: چاوەڕێی بەغداین بۆ ناردنی 120 ملیار دینار داهاتی نانەوتی

ئاڤا نیوز

ڕێکارەکانی خەرجکردنی مووچەی مانگی شەشی مووچەخۆرانی هەرێمی کوردستان دەستپێدەکات، وەزارەتی دارایی و ئابوویی هەرێمی کوردستانیش دەڵێت، "هەر کات ڕێکارەکان لە بەغدا دەستپێبکات، 120 ملیار دیناری داهاتی نانەوتی بۆ وەزارەتی دارایی عێراق دەنێرین".

چیرۆکی سەرەکی: ڕۆژی سێشەممە ئەنجوومەنی وەزیرانی عێراق کۆبوونەوە. لە کۆبوونەوەکەدا محەممەد شیاع سوودانی، سەرۆکوەزیرانی عێراق بڕیاری دا مووچەی مانگی شەشی فەرمانبەرانی هەرێمی کوردستان خەرج بکات، بەو مەرجەی هەرێمی کوردستان 120 ملیار دیناری داهاتی ناوخۆ بداتە بەغدا.

لێدوانی فەرمی: سەرچاوەیەک لە وەزارەتی دارایی و ئابووری هەرێمی کوردستان بە ئاڤای گوت، "120 ملیار دینار ئامادەیە، ئەگەر هەیە ئەمڕۆ بیخەینە سەر هەژماری بانکی وەزارەتی دارایی عێراق، بەڵام پێش ئەوە پێویستمان بە دەستپێکردنی ڕێکارەکانی وەزارەتی دارایی عێراقە بۆئەوەی داهاتەکە بنێرین."

ئەمەش بزانە: بڕیارە ئەمڕۆ چوارشەممە، نووسراوی خەرجکردنی مووچەی مانگی شەشی مووچەخۆرانی هەرێمی کوردستان بخرێتە بەردەم تەیف سامی، وەزیری دارایی عێراق، ماوەتەوە سەر ئەوەی پارەکە بخرێتە سەری هەژماری بانکی وەزارەتی دارایی هەرێمی کوردستان.