ڤیدیۆی دانپێدانانی گرووپێکی سەر بە لاهوور شێخ جەنگی بڵاوکرایەوە

ئاڤا نیوز

دەزگای ئاسایشی هەرێم بە ڤیدیۆ دانپێدانانی گرووپێکی شەش کەسی بڵاوکردەوە، دان بەوەدا دەنێن پلانی به‌ ئامانجگرتنی بافڵ تاڵەبانی و چه‌ند کەسایەتیه‌كی دیكه‌یان هەبووە.

ڕاگەیێنراوی فەرمی: دەزگای ئاسایشی هەرێمی کوردستان ڕایگەیاندووە، زنجیرەپلانێکى هاوبەش لەنێوان لاهوور شێخ جەنگى و ئەژى ئەمین بۆ تێکدانى سەقامگیریى سلێمانى هەبووە، بەپێی بەڵگەکانیان، هەریەک لە لاهوور شێخ جەنگی و ئەژی ئەمین پێکەوە پلانیان بۆ کوشتنی بافڵ تاڵەبانی داناوە.

بەپێی ڕاگەیێنراوەکەی دەزگای ئاسایش، دادگا فەرمانى دەستگیرکردنى بۆ ژمارەیەک کەس دەرکردووە کە گومان دەکرێت دەستیان هەبووبێت لە سەرپەرشتى و ڕێکخستنى هەوڵەکان، ئەو کەسەی هەوڵی کوشتنی بافڵ تاڵەبانی بە نیشانشکێن داوە، ناوی ڕێبوار قودرەتە.

ئەوەی پێویستە بیزانیت: ناوی ئەو کەسانەی کە لە ڤیدیۆکەدا "دانپێدانانیان" لێوەرگیراوە:

- ڕێبوار قودرەت، خەڵکی چوارقوڕنەیە

- ڕێنوار زریان سەباح

- عومەر شێخ عەبدوڵڵا، پاسەوانی لاهوور شێخ جەنگی

- بۆتان مستەفا حسێن، خەڵکی کەلارە

- موسلیم عەبدولڕەحمان محەممەد، دانیشتووی سۆرانە

پلانەکە: بەگوێرەی دانپێدانانەکە یەکێک لە گەنجەکان ناوی ڕێنوار زریان فەتاحە و دەڵێت، "ماوەى 45 ڕۆژ دەبێت پلانێک دانراوە بۆ لێدان لە بافڵ تاڵەبانی، بۆ دەستپێکى پلانەکەش سێ شوێنمان وەرگرت یەکەمیان سیتى تاوەرز، دووەم هەوارى جوان، سێیەمیان گوندى ئەڵمانى بوو" و ویستوویانە لەم شوێنانەوە "پلانەکەیان" جێبەجێ بکەن".

لاهوور شێخ جەنگی شەوی ڕووداوەکەی لالەزار بە تەلەفۆن وەڵامی پرسیارەکانی هەوراز گوڵپی و ئاڤا میدیای دایەوە، لەبارەی تۆمەتەکانی یەکێتیی بەوەی هەوڵی تێکدانی سەقامگیری سلێمانی داوە ڕایگەیاند، "بەوخوایە ئەم ماوەیە یەک دوو جمووجۆڵم هەبووە و سەردانی یەک دوو تەعزیەم کردووە، نازانم ئەم بیانوو گرتنە چییە".

باکگراوند: بەرەبەیانی ڕۆژی هەینی 22-8-2025، شەڕ و پێكدادانی سەخت لە هۆتێل لالەزار، لەنێوان هێزەكانی یەكێتی و لاهور شێخ جەنگی، سەرۆكی بەرەی گەل هەڵگیرسا و چەكی قورس و مامناوەند لە شەڕەكە بەكارهێنرا، دەرەنجام سەرۆکی بەرەکە و ژمارەیەکی زۆر لە چەکدارانی نێو هۆتێلەکە دەستگیرکران و ژمارەیەکیش کوژران و برینداربوون.