کۆبوونەوەی ئەنجوومەنی پارێزگای کەرکووک دوا دەخرێت

ئاڤا نیوز

کۆبوونەوەی ئەمڕۆی ئەنجوومەنی پارێزگای کەرکووک لەسەر داوای دوو ئەندامی پێکهاتەی عەرەبی بۆ هەفتەی داهاتوو دواخرا، سەرۆکی ئەنجوومەنەکەش دەڵێت، ئەوانەی بایکۆتی کۆبوونەوەکان دەکەن ڕێکاری یاساییان لەدژ دەگرنەبەر.

وێنە گەورەکە: نۆ ئەندام لە کۆی 16 ئەندامی ئەنجوومەنی پارێزگای کەرکووک مانگی ئابی ساڵی ڕابردوو بە زۆرینەی دەنگ حکومەتی کەرکووکیان پێکهێنا، لەو کاتەشەوە تائێستا ئەگەر یەک ئەندام لەو نۆ ئەندامە نەخۆش بێت، مۆڵەت بکات یان لە شتێک ناڕازی بێت، کۆبوونەوەکانی ئەنجوومەنەکە پەکی دەکەوێت، چونکە حەوت ئەندامەکەی دیکە دەوام دەکەن، بەڵام بەشداری کۆبوونەوەکان ناکەن.

لێدوانی فەرمی: محەممەد حاف، سەرۆکی ئەنجوومەنی پارێزگای کەرکووک ڕایگەیاند، کۆبوونەوەی ئەمڕۆی ئەنجوومەن لەسەر داواکاری دوو ئەندامی ئەنجوومەنی پارێزگا بۆ سێشەممەی داهاتوو دواخرا کە بڕیاربوو تیایدا گفتوگۆ لەسەر نەخشە و ماستەرپلانی کەرکووک بکرێت و دوایین ئامادەکارییەکان بۆ ڕاگەیاندنی دامەزراندنی حەوت هەزار پلەی وەزیفی لە پارێزگاکە تاوتوێ بکرێت.

ئاماژەی بەوەشکرد، سێشەممەی داهاتوو کۆبوونەوەی ئەنجوومەنی پارێزگا دەکرێت، دوای ئەو کۆبوونەوەیەش ڕێکاری دادوەریی و یاسایی بەرامبەر ئەو ئەندامانەی ئەنجوومەن دەگرنەبەر کە بایکۆتی دانیشتنەکانیان کردووە.