دەوڵەتی یاسا: کار بۆ دواخستنی هەڵبژاردنەکان دەکرێت

ئاڤا نیوز

هاوپەیمانیی دەوڵەتی یاسا بە سەرۆکایەتی نوری مالکی ئاشکرای کرد، پڕۆژەیەکی مەترسیدار لەلایەن چەند لایەنێکی سیاسییەوە بە هەماهەنگی لایەنی دەرەکیی بۆ دواخستنی هەڵبژاردنی پەرلەمان لە ئارادایە.

وێنە گەورەکە: هەڵبژاردنی ئەمجارەی پەرلەمانی عێراق ململانێی بەهێزی خستووەتەوە نێوان سوودانی و مالیکی بۆ بەدەستهێنانی پۆستی سەرۆکوەزیران، هاوکات  کێبڕکێ و ململانێی قورس لەنێو چوارچێوەی هەماهەنگی (هاوپەیمانێتی شیعەکان) لەسەر پۆستی سەرۆکوەزیران دروست بووە و بەپێی عورفی سیاسیش سەرۆکوەزیران دەبێت بۆ شیعە بێت.

لێدوانی فەرمی: حوسێن مالیکی، سەرکردە لە هاوپەیمانیی دەوڵەتی یاسا بە ئاڤا میدیای ڕاگەیاند:  چەند لایەنێکی سیاسی بە شێوەیەکی ڕاستەوخۆ یان ناڕاستەوخۆ، بە هەماهەنگی لەگەڵ لایەنی دەرەکیی کار بۆ دواخستنی هەڵبژاردنی پەرلەمانی عێراق دەکەن، لەڕێگەی پڕۆژەیەکەوە ئامانج لێی پێکهێنانی حکومەتێکی کاتییە تا وادەیەکی دیکەی هەڵبژاردن، ئەم سیناریۆیەش مەترسی جددی لەسەر یەکپارچەیی و داهاتووی عێراق دروست دەکات.

مالیکی هۆشداری بڕیارێکی لەم جۆرەی دا کە بۆشایی دەستووری و لەدەستدانی شەرعییەتی سیاسی لێدەکەوێتەوە و  ئاماژەی بەوەشکرد، دواخستنی هەڵبژاردنەکان تەنیا درێژکردنەوەی تەمەنی پەرلەمان و حکومەت نییە، بەڵکو دەرگا بۆ قەیرانێک دەکاتەوە ڕەنگە کۆنترۆڵکردنی قورس بێت.

ئەوەی پێویستە بیزانیت: بڕیارە 11-11-2025، هەڵبژاردنی خولی نوێی پەرلەمانی عێراق بکرێت و زیاتر لە حەوت هەزار کاندید کێبڕکێ لەسەر 329 کورسییەکەی پەرلەمان دەکەن، تا ئێستاش کۆمیسیۆن بەهۆکاری جیاواز ژمارەیەک کاندیدی دوورخستووەتەوە و وردبینیش لە ناوی کاندیدەکان بەردەوامە.