ئۆجەلان: پرۆسەی ئاشتی پێویستی بە هەنگاوی بەپەلەیە

ئاڤا نیوز

عەبدوڵڵا ئۆجەلان، ڕێبەری زیندانیكراوی پەكەكە لەڕێگەی شاندی ئیمرالییەوە پەیامێك بڵاو دەكاتەوە و داوا دەكات لە جێبەجێكردنی سەرجەم ڕەهەندەكانی پرۆسەی ئاشتی پەلە بكرێت.

چیرۆكی سەرەكی: دوێنێ پێنجشەممە 28-8-2025، شاندی ئیمرالی لەگەڵ عەبدوڵڵا ئۆجەلان، كۆبوونەوە و ئەمڕۆ هەینیش دەم پارتی ڕاگەیێنراوێكی سەبارەت بە ناوەڕۆكی كۆبوونەوەكە بڵاو كردەوە و تیایدا ئاماژەش بە پەیامێكی ئۆجەلان دراوە.

ڕاگەیێنراوی فەرمی:  دەم پارتی بڵاوی كردەوە: كۆبوونەوەی شاندی ئیمرالی لەگەڵ عەبدوڵڵا ئۆجەلان، سێ كاتژمێری خایاند و تەندروستیی زۆر باش بووە و لەمیانەدا ناوبراو هەڵسەنگاندنی بۆ قۆناغەكانی پرۆسەی ئاشتی و دۆخی ئێستای پرۆسەكە كردووە.

- ئۆجەلان ئاماژەی بە ئەوە داوە كە پرۆسەكە بە وردی بەڕێوە بردراوە بۆ ئەوەی بگاتە ئەو ئاستەی ئێستا، ئامانجیان ئەوەیە كۆتایی بە قۆناغێكی پڕ لە ئازار بهێنن.

زانیاریی زیاتر: بەپێی ڕاگەیێنراوەكەی دەم پارتی، عەبدوڵڵا ئۆجەلان ڕایگەیاندووە كە پێویستە دەست بە قۆناغێكی نوێ بكرێت و هەنگاوی بەپەلە بۆ جێبەجێكردنی پرۆسەی ئاشتی لە هەموو ڕەهەندەكان بنرێت، هاوكات ڕەخنەشی لە بەشێك لە لایەنە سیاسییەكان و میدیا گرتووە كە هەوڵی بێبایەخكردن و زیانگەیاندن بە پرۆسەی ئاشتییان داوە، جەختیشی لەسەر باوەڕی قووڵی خۆی بە ئاشتیی نێوان گەلان كردووەتەوە.